नेत्र शाही
जुम्ला, पुस २१ गते । कर्णाली राजमार्ग अन्तर्गत जुम्लाको त्रिवेणीमा अटो दुर्घटना हुँदा दुई जनाको मृत्यू भएको छ । जिल्ला प्रहरी कार्यालय जुम्लाका प्रहरी निरीक्षक तथा सूचना अधिकारी यमबहादुर बुढामगरका अनुसार क १ स ११ नम्बरको जुम्लादेखि नाग्म जाँदैगरेको अटो दुर्घटनामा परी जुम्ला तातोपानी १ निवासी २९ बर्षीय पुरन सार्कीको घटनास्थलमा मृत्यु भएको छ ।
त्यस्तै, जुम्ला तिला गाउँपालिका –३ थापागाउँका २० बर्षीय आकाश थापाको अस्पतालमा उपचारको क्रममा मृत्यु भएको छ । जिल्ला प्रहरी कार्यालयका अनुसार सार्कीको घटनास्थलमा र थापाको उपचारको क्रममा कर्णाली स्वास्थ्य विज्ञान प्रतिष्ठान शिक्षण अस्पताल जुम्लामा मृत्यूभएको छ ।
प्रहरीका अनुसार अटोले पाउरोटी ओसारपसार गर्दैआएको थियो । यसैगरी अटो कर्णाली राजमार्गबाट १० देखि १५ मिटर तल तिला नदीको छेउमा खसेको थियो । आज दिउँसो २ बजे अटो दुर्घटनामा परेको प्रहरीले जनाएको छ ।
