नेपाल–बङ्गलादेश जलस्रोत समितिको बैठक काठमाडौंमा सुरु

काठमाडौं, साउन १२ गते । नेपाल–बङ्गलादेश जलस्रोत समितिको सचिवस्तरीय संयुक्त बैठक काठमाडौंमा सुरु भएको छ । झण्डै १५ वर्षपछि नेपाल र बङ्गलादेशबीच जलस्रोत समितिको सचिवस्तरीय संयुक्त बैठक बिहीबार बसेको हो ।

अघिल्लो बैठक सन् २००८ को फेबु्रअरी २६ देखि २९ सम्म भएको थियो । दुई दिन चल्ने बैठकमा जलस्रोतको उपयोग तथा बाढी नियन्त्रणसम्बन्धी मुख्य एजेण्डामा छलफल हुने बताइएको छ  ।

बैठकमा नेपालको तर्फबाट ऊर्जा, जलस्रोत तथा सिंचाई मन्त्रालयका सचिव सागर राई तथा बङ्गलादेशको तर्फबाट जलस्रोत मन्त्रालयका वरिष्ठ सचिव कवीर विन अनवरले नेतृत्व गर्नुभएको छ । बैठकमा जलवायु परिवर्तनको मुद्दा एवम् जल तथा मौसमसम्बन्धी तथ्याङ्कहरूको आदानप्रदानका विषयमा पनि छलफल हुने बताइएको छ ।