साहारा लिम्बू
फुङलिङ, वैशाख १६ गते । ताप्लेजुङमा निःशुल्क आँखा परीक्षण तथा मोतिबिन्दु शल्यक्रिया सेवा सहितको विशेष आँखा शिविर सञ्चालन हुने भएको छ । नेपाल नेत्र ज्योति सङ्घ ताप्लेजुङ, मेची आँखा अस्पताल बिर्तामोड झापा, मेरिङदेन गाउँपालिका तथा सेवा फाउण्डेसन काठमाडौँको संयुक्त आयोजनामा उक्त शिविर सञ्चालन हुने भएको हो ।
डिचेन डोङ्गाला स्मारका आँखा उपचार केन्द्र ताप्लेजुङका वरिष्ठ नेत्र अधिकृत तथा क्लिनिक इनचार्ज काजी गुरुङका अनुसार मेची आँखा अस्पतालको प्राविधिक सहयोगमा शिविर सञ्चालन हुने छ । पहिलो चरणको शिविर यही वैशाख २१ र २२ गते दोभान बजारस्थित दोभान आँखा उपचार केन्द्रमा सञ्चालन हुनेछ ।
त्यस्तै दोस्रो चरणको शिविर वैशाख २४ गतेदेखि २६ गतेसम्म डिचेन डोङ्गला स्मारक आँखा उपचार केन्द्र ताप्लेजुङमा सञ्चालन हुने गुरुङले जानकारी दिनुभयो ।
शिविर अवधिभर आँखासम्बन्धी विभिन्न समस्या भएका बिरामीहरूको निःशुल्क परीक्षण गरिनुका साथै मोतिबिन्दु भएका बिरामीहरूको छनोट गरी निःशुल्क शल्यक्रिया गरिने व्यवस्था मिलाइएको छ । शिविरमा सहभागी हुने बिरामीहरूलाई आवश्यक औषधि निःशुल्क वितरण गरिने आयोजकले जनाएको छ ।
साथै ४० वर्षभन्दा माथिका बिरामीहरूलाई पढ्नका लागि आवश्यक पर्ने चश्मा पनि निःशुल्क उपलब्ध गराइनेछ । ग्रामीण भेगका सर्वसाधारणलाई सहज रूपमा विशेषज्ञ सेवा उपलब्ध गराउने उद्देश्यले शिविर सञ्चालन गर्न लागिएको नेपाल नेत्र ज्योति सङ्घ ताप्लेजुङका अध्यक्ष राजकुमार गुरुङले बताउनुभयो । उहाँले आँखाको समस्या भएका बिरामीहरूलाई समयमै परीक्षण गराई सेवा लिन आग्रह गर्नुभएको छ ।
शिविरबाट विशेष गरी आर्थिक अवस्था कमजोर भएका तथा नियमित उपचारबाट टाढा रहेका नागरिकलाई प्रत्यक्ष लाभ पुग्ने विश्वास लिइएको मेरिङ्देन गाउँपालिकाका अध्यक्ष युकहाङ विर हाङ्गाम (डम्बर) ले बताउनुभयो ।
