शंकर केसी
सल्यान, चैत २२ गते । सल्यानबाट प्रहरीले २५ वटा ट्याक्टर नियन्त्रणमा लिएको छ ।
जिल्लाका विभिन्न खोला तथा नदी क्षेत्रबाट अवैध रूपमा बालुवा तथा गिट्टी उत्खनन र ओसारपसार गर्ने गतिविधिविरुद्ध प्रहरीले सक्रियता बढाएको हो ।
यसक्रममा पछिल्लो चार दिनको अवधिमा २५ वटा ट्याक्टर नियन्त्रणमा लिइएको जिल्ला प्रहरी कार्यालय सल्यानले जनाएको छ ।
प्रहरीका अनुसार शारदा, थारमारे, लुहाम, सल्ली लगायतका विभिन्न स्थानबाट ती ट्याक्टरहरू नियन्त्रणमा लिइएका हुन् ।
नियन्त्रणमा लिइएका सबै सवारी साधनहरू सम्बन्धित प्रहरी चौकीमा राखी आवश्यक कारबाही प्रक्रिया अगाडि बढाइएको जिल्ला प्रहरी कार्यालयका प्रवक्ता प्रहरी निरीक्षक देवराज भट्टराईले जानकारी दिनुभयो ।
पछिल्लो समय अवैध उत्खनन तथा ढुवानीमा संलग्न सवारी साधनमाथि निगरानी बढाइएको उहाँको भनाइ छ । “नियमविपरीत सञ्चालन हुने ट्याक्टरहरू नियन्त्रणमा आउन थालेपछी यस्ता गतिविधिमा केही कमी आएको देखिएको छ,” उहाँले भन्नुभयो ।
प्रहरीले जिल्लाभर नै अनुगमन तथा नियन्त्रण अभियानलाई निरन्तरता दिएको जनाएको छ ।
विशेषगरी नदी तथा खोलानालाबाट अनुमति बिना प्राकृतिक स्रोत दोहन गर्ने कार्यलाई नियन्त्रण गर्न कडाइ गरिएको हो ।साथै प्रहरीले अनुमति नलिई यस्ता गतिविधिमा संलग्न नहुन तथा नगराउन सबै सरोकारवालासँग अनुरोध गरेको छ ।
नियम उल्लङ्घन गर्ने जोकोहीलाई कानुन अनुसार कारबाहीको दायरामा ल्याइने चेतावनी समेत दिइएको छ ।
