प्रशिक्षण उडानमा सुखोई जेट दुर्घटना, दुई पाइलटको मृत्यु

नयाँदिल्ली, फागुन २२ गते । भारतको उत्तरपूर्वी क्षेत्रमा प्रशिक्षण उडानका क्रममा भारतीय वायु सेनाको एक लडाकू जेट दुर्घटनाग्रस्त हुँदा त्यसमा सवार दुई पाइलटको मृत्यु भएको भारतीय वायु सेनाले शुक्रबार जनाएको छ ।

वायु सेनाका अनुसार दुई सिट क्षमतायुक्त लामो दूरीको सुखोई-३० एमकेआई लडाकू विमान बिहीबार राति एयरबेसबाट नियमित प्रशिक्षण उडानका लागि उडेको थियो । केही समयपछि असम राज्यको कार्बी आङ्लोङ जिल्लामा उक्त विमान दुर्घटनाग्रस्त भएको जानकारी दिइएको छ । दुर्घटनापछि उद्धार टोली घटनास्थल पुगेको थियो, तर विमानमा रहेका दुवै पाइलटको ज्यान जोगाउन नसकिएको वायु सेनाले जनाएको छ ।

दुर्घटनाको कारण तत्काल स्पष्ट नभएको र त्यसबारे विस्तृत अनुसन्धान सुरु गरिएको अधिकारीले बताएका छन् । प्रारम्भिक विवरण सङ्कलन गरिँदै गरेको र प्राविधिक पक्षसहित सम्पूर्ण अवस्थाको अध्ययन गरेर वास्तविक कारण पत्ता लगाइने बताइएको छ । भारतीय रक्षामन्त्री राजनाथ सिंहले सामाजिक सञ्जालमार्फत शोक व्यक्त गर्दै दुर्घटनामा ज्यान गुमाएका पाइलटप्रति गहिरो दुःख प्रकट गर्नुभएको छ । 

उहाँले मृतक पाइलटका परिवारप्रति समवेदना व्यक्त गर्दै राष्ट्रले उनीहरूको सेवाको उच्च कदर गर्ने बताउनुभयो । सुखोई-३० एमकेआई लडाकू विमान रुसको डिजाइनमा आधारित बहुउद्देश्यीय जेट हो, जसलाई भारतको सरकारी स्वामित्वमा रहेको हिन्दुस्तान एरोनटिक्स लिमिटेडले इजाजतपत्र अन्तर्गत उत्पादन गर्दै आएको छ । भारतीय वायु सेनाले यस्ता २६० भन्दा बढी विमान सञ्चालन गरिरहेको बताइन्छ ।

यसअघि पनि भारतले पछिल्ला वर्षमा यस्ता जेटसम्बन्धी दुर्घटना भोगेको छ । सन् २०२४ को जुन र सन् २०२३ को जनवरीमा समेत सुखोई जेट दुर्घटनामा परेका घटना सार्वजनिक भएका थिए, जसले वायु सेनाभित्र सुरक्षा र प्राविधिक जाँचको विषयमा थप ध्यान दिनुपर्ने आवश्यकता औँल्याएको छ । रासस/एपी