गृहमन्त्री अर्यालसहित उच्च अधिकारीबाट उपत्यकाका मतदान स्थलको अनुगमन

काठमाडौँ, फागुन २१ गते । गृहमन्त्री ओमप्रकाश अर्याल, गृहसचिव राजकुमार श्रेष्ठ र सुरक्षा निकायका प्रमुखसहितको टोलीले काठमाडौँ उपत्यकाका विभिन्न मतदान स्थलको स्थलगत निरीक्षण तथा अनुगमन गर्नुभएको छ।

गृहमन्त्री अर्यालले प्रतिनिधिसभा सदस्य निर्वाचनअन्तर्गत ललितपुर क्षेत्र नं ३ मा मतदान गरेलगत्तै सुरक्षा निकायका प्रमुखसहित काठमाडौँ र ललितपुरका विभिन्न मतदान स्थलको अनुगमन गर्नुभएको हो। उहाँले सो क्रममा मतदातासँग दोहोरो कुराकानीसमेत गर्नुभयो। निरीक्षणका क्रममा मतदाताले गृहमन्त्री अर्यालको प्रशंसा गर्दै बधाई दिएका थिए। केही मतदाताले अँगालो हालेर खुसी आदानप्रदान गरे। मन्त्री अर्यालले पनि मतदातासँग सौहार्दपूर्ण कुराकानी गर्दै मतदान स्थलहरूको समग्र अवस्थाबारे मतदान अधिकृत र सुरक्षा निकायबाट जानकारी लिनुभएको थियो।

टोलीले ललितपुरको सानेपास्थित टीका विद्याश्रम मावि, काठमाडौँको तारकेश्वरस्थित नागार्जुन मावि र पृथ्वीनारायण मावि तथा बालुवाटारको पञ्चकन्या आधारभूत विद्यालयको निरीक्षण गरेको थियो।

अनुगमनमा प्रहरी महानिरीक्षक दानबहादुर कार्की, सशस्त्र प्रहरी महानिरीक्षक राजु अर्याल, राष्ट्रिय अनुसन्धान विभागका प्रमुख टेकेन्द्र कार्की, नेपाली सेनाका बलाधिकृत रथी प्रदीपजङ्ग केसी र गृह मन्त्रालयको सुरक्षा तथा समन्वय महाशाखाका प्रमुख एवं प्रवक्ता आनन्द काफ्लेलगायत सहभागी हुनुहुन्थ्यो।

अनुगमनकै क्रममा गृहमन्त्री अर्यालले हल्चोकस्थित सशस्त्र प्रहरी बलको मुख्यालयमा रहेको केन्द्रीय निर्वाचन सेलको निरीक्षण गर्नुभयो। मतदान स्थल अनुगमनका क्रममा गृहमन्त्री अर्यालले निर्वाचन शान्तिपूर्ण वातावरणमा उत्साहजनक रूपमा भइरहेको बताउनुभयो। उहाँले छिटफुट घटनाबाहेक देशभरको समग्र शान्ति सुरक्षाको अवस्था सामान्य रहेको उल्लेख गर्नुभयो।

अनुगमनपछि गृहमन्त्री अर्यालले प्रधानमन्त्री निवास बालुवाटार पुगेर सम्माननीय प्रधानमन्त्री सुशीला कार्कीसमक्ष ब्रिफिङ गर्नुभएको थियो। निर्वाचन सुरक्षाको सन्दर्भमा मन्त्री अर्यालले गृह मन्त्रालयबाट सबै निर्वाचन क्षेत्रको निरन्तर अनुगमन गरिरहनुभएको छ।