परासी, फागुन १४ गते । राष्ट्रिय स्वतन्त्र पार्टी (रास्वपा) पश्चिम नवलपरासीका संस्थापक जिल्ला सभापति महेन्द्रसिंह ठकुरीले पार्टी परित्याग गरी नेपाली कांग्रेसमा प्रवेश गर्नुभएको छ ।
बिहीबार बर्दघाट–१२ स्थित चौपत्तामा आयोजित चुनावी सभामा नेपाली कांग्रेसका सभापति विश्वप्रकाश शर्माले ठकुरीलाई पार्टीमा स्वागत गर्नुभयो । रास्वपाका तर्फबाट जिल्लाको नेतृत्व गरिरहनुभएका ठकुरी पछिल्लो समय उम्मेदवार चयन र टिकट वितरणको विषयलाई लिएर नेतृत्वसँग असन्तुष्ट हुनुहुन्थ्यो ।
ठकुरीले २०७९ सालको प्रतिनिधि सभा निर्वाचनमा रास्वपाका तर्फबाट १२ हजार ४९९ मत प्राप्त गर्नुभएको थियो । निर्वाचनको पूर्वसन्ध्यामा प्रभावशाली नेता ठकुरीले पार्टी छाडेपछि पश्चिम नवलपरासीमा रास्वपालाई ठुलो धक्का लागेको विश्लेषण गरिएको छ ।
नेपाली कांग्रेस लुम्बिनी प्रदेशका पूर्वमहामन्त्री विक्रम खनाल रास्वपामा प्रवेश गरी टिकट पाएपछि ठकुरी रुष्ट बन्नुभएको थियो । यसअघि सुस्ता गाउँपालिकाका उपसभापति रहनुभएका महेन्द्रका दाजु गुप्तसेन ठकुरीले पनि रास्वपा परित्यागको घोषणा गरिसक्नुभएको छ ।
