ताप्लेजुङ, फागुन २ गते । आगामी निर्वाचनको तयारी र हिमाली जिल्लाको वस्तुस्थिति बुझ्ने क्रममा प्रधानमन्त्री सुशीला कार्कीले आज ताप्लेजुङको पाथीभरा र फुङलिङ क्षेत्रमा स्थानीय बासिन्दा तथा सरकारी अधिकारीसँग अन्तर्क्रिया गर्नुभएको छ ।
बिहानै प्रसिद्ध तीर्थस्थल पाथीभराको दर्शनपछि प्रधानमन्त्री कार्कीले त्यहाँ भेला भएका स्थानीय तथा विभिन्न क्षेत्रका दर्शनार्थीसँग अन्तर्क्रिया गर्नुभयाे । उहाँले भन्नुभयो, "म यहाँ चुनाव सफल होस् भन्नका लागि आएकी हुँ । तपाईँहरू सबै जना मतदान गरिदिनुहोला । चुनावलाई शान्तिपूर्ण बनाउन आ–आफ्नो ठाउँबाट भूमिका खेलिदिनुहोला । यसपालिको चुनाव अरू नियमितजस्तो सामान्य चुनाव होइन । यो विशेष अवस्थामा हुन लागेको चुनाव हो । यसले देशलाई निकास दिनुपर्छ । देशको भविष्य कोर्ने चुनाव हो यो ।"
उहाँले उपस्थित सर्वसाधारणका जिज्ञासाको जवाफ दिनुका साथै समूहमा तस्बिर पनि खिचाउनुभयाे । प्रधानमन्त्री कार्कीलाई पाथीभरा क्षेत्र विकास समितिका अध्यक्ष रक्की थेबे र पुजारी डिल्लीरमण पौडेललगायतले स्वागत गर्नुभयाे । पाथीभराबाट आजै प्रधानमन्त्री कार्की ताप्लेजुङको सदरमुकाम फुङलिङमा सरकारी अधिकारीसँग छलफल गर्नुभएकाे छ ।
मुख्य निर्वाचन अधिकृत एवं जिल्ला न्यायाधीश विकास श्रेष्ठ, प्रमुख जिल्ला अधिकारी शिवराज सेढाईँ, नेपाली सेनाको दुर्गादल गुल्मका गुल्मपति सेनानी उमेश खड्का, ताप्लेजुङका प्रहरी प्रमुख प्रहरी नायब उपरीक्षक वेदप्रसाद गौतम, सशस्त्र प्रहरी बल नेपाल नम्बर १ गुल्म हेडक्वार्टर कञ्चनजङ्घाका गुल्मपति सशस्त्र प्रहरी नायब उपरीक्षक प्रमोदप्रकाश पाठकलगायतले निर्वाचन तयारी र सुरक्षा अवस्थाका बारेमा प्रधानमन्त्री कार्कीलाई जानकारी गराउनुभयाे ।
प्रमुख जिल्ला अधिकारी सेढाईँका अनुसार ९० हजार ३२७ मतदाता र एक मात्र निर्वाचन क्षेत्र रहेको ताप्लेजुङमा दुई अस्थायीसहित ८२ मतदानस्थल तोकिएको छ । यीमध्ये चारवटा मतदानस्थल भौगोलिक रूपमा विकट र हिमाली क्षेत्रमा रहेका छन् । अहिलेसम्म मौसम सामान्य रहेको र खासै प्रतिकूलता नरहेको भए पनि हिमपात भएमा मतदानका लागि कर्मचारी आवतजावत गर्न कठिन हुन सक्ने उहाँको भनाइ छ । साथै, उहाँले मतपेटिका हेलिकोप्टरबाट ओसार्ने व्यवस्थाका लागि अनुरोध पनि गर्नुभयाे ।
अहिलेसम्म सुरक्षा अवस्था सामान्य रहेको, कुनै अप्रिय घटना नभएको र चारवटै सुरक्षा निकायबीच चुस्त समन्वय रहेका कारण आगामी दिनमा अझै सहज ढङ्गले निर्वाचन गतिविधि सम्पन्न गर्न सकिनेमा आफूहरू ढुक्क रहेको पनि उहाँले बताउनुभयाे ।
छलफलको समापनमा प्रधानमन्त्री कार्कीले यो निर्वाचन शान्ति, सुरक्षा, स्वच्छता र मितव्ययिता सबै कोणबाट भविष्यका लागि मानक बन्ने गरी काम गर्न निर्देशन दिनुभयाे । "तपाईँहरूले निर्वाचनका लागि गर्नुभएको प्रयास सराहनीय छ । तपाईँहरू यसरी खटेको देखेर मेरो आत्मविश्वास अझै बढेको छ," प्रधानमन्त्री कार्कीले भन्नुभयो, "यो चुनाव मुलुकलाई एउटा नयाँ चरणमा रूपान्तरण गर्ने महत्त्वपूर्ण कोसेढुङ्गा हो । राष्ट्रको जीवनमा दीर्घकालीन प्रभाव पार्ने भएकाले त्यही प्रकारको गम्भीरता र जिम्मेवारीबोध हामी सबैमा हुनु जरुरी छ । त्यसैले भविष्यका लागि पनि यो चुनाव मानक बन्नुपर्छ ।" प्रधानमन्त्री कार्की दुई दिने भ्रमण सकेर आजै काठमाडौँ फर्किनुभएको छ ।
