राधाकृष्ण डुम्रे
वालिङ (स्याङ्जा), माघ ११ गते । स्याङ्जाको वालिङमा रहेको सशस्त्र प्रहरी बल नेपाल नम्बर ३० गुल्मको स्थापना दिवस पारेर सहिद परिवारका सदस्यलाई सम्मानित गरिएको छ ।
गुल्म हेडक्वाटर वालिङमा आयोजना गरिएको कार्यक्रममा पूर्व हवल्दार स्वर्गीय लिला बहादुर थापाका दाजु मिनबहादुर थापालाई सम्मानित गरिएको हो । मझकुर सशस्त्र प्रहरी बल नेपाल नं. ४ बाहिनी मुख्यालय कास्कीका बाहिनीपति सशस्त्र प्रहरी नायव महानिरीक्षक दिपेन्द्र शाहले सम्मानित गर्नुभएको हो ।
तत्कालिन सशस्त्र प्रहरी बल तालिम केन्द्र वालिङमा कार्यरत हवल्दार थापाको २०५८ सालमा दोहोरो भिडन्तमा ज्यान गएको थियो । कालीगण्डकी गाउँपालिका–३ का थापाको दाङको सतवरियामा माओवादीसँगको भिडन्तमा ज्यान गएको उहाँको दाजु मिनबहादुरले बताउनुभयो ।
सशस्त्र द्वन्द्वकाे अवस्थामा २०५८ साल माघमा स्थापना भएको तालिम केन्द्रलाईपछि गुल्म बनाइएको गुल्मपति कुमार तिमिल्सिनाले जानकारी दिनुभयो ।
स्थापना दिवसका अवसरमा आयोजित कार्यक्रममा सशस्त्र प्रहरी नायव महानिरीक्षक दिपेन्द्र शाहले जिल्लाको शान्ति सुरक्षामा सशस्त्र प्रहरीले महत्वपूर्ण भूमिका खेल्दै आएको बताउनुभयो । शान्ति सुरक्षासहित विपत्ति लगायतका घटनाहरुमा स्थानीयको साथ र सहयोगबाट काम गर्दै आएको स्पष्ट पार्नु भयो ।
सो अवसरमा शाहले आसन्न निर्वाचनलाई शान्त, निष्पक्ष र भयरहित वातावरणमा सम्पन्न गर्न प्रहरी जवानहरुलाई निर्देशन दिनुभयो । नागरिकहरुको सुरक्षा प्रदान गर्दै आएको सशस्त्र प्रहरीका लागि स्थायी जग्गा नभएकाले स्थायी जग्गा उपलब्ध गराई सहयोग गर्न उहाँको आग्रह छ ।
कार्यक्रममा प्रमुख जिल्ला अधिकारी ईश्वरीप्रसाद अर्यालले प्राकृतिक विपत्ति लगायतका परिस्थितिमा सशस्त्र प्रहरीले पुर्याएको योगदान प्रशंसनीय रहेको बताउनुभयो ।
कार्यक्रममा ३० नं. गुल्मका गुल्मपति तिमिल्सिनाले संगठनले प्राप्त गरेका जिम्मेवारीहरु कुशलता पूर्वक निर्वाह गर्दै आएको बताउनुहुँदै यसका लागि जिल्लावासी नागरिकको ठूलो सहयोग रहेको जानकारी दिनुभयो ।
