पौडीमा नासिर र डुवानाद्वारा नयाँ कीर्तिमान कायम

काठमाडौं, असार २८ गते । १०औं एनएसए कप खुला तथा उमेर समूह पौडी प्रतियोगितामा नासिर याह्या हुसेन र डुवाना लामाले नयाँ कीर्तिमान राख्न सफल हुनुभएको छ । नेपाल पौडी संघको आयोजनामा सातदोवाटो पौडी पोखरीमा भएको प्रतियोगितामा मंगलबार नासिरले १०० मिटर ब्याकस्ट्रोकमा १ मिनट ४.४६ सेकेन्डकको नयाँ कीर्तिमान बनाउनुभयो । 

नासिरले १०० मिटर बटरफ्लाईमा १९ मार्च २०२१ मा सिंगापुरमा आयोजना भएको ५१औं सिंगापुर राष्ट्रिय उमेर समूह आमन्त्रण २०२१ मा सायद हम्जा शाहले राखेको ५९.९४ सेकेन्डको कीर्तिमान भंग गर्दै ५९.६० को नयाँ किर्तिमान कायम गर्नुभएको हो । डुवानाले आफैले हिट चरणमा कायम गरेको ३५.८९ सेकेन्डको समयमा सुधार गर्दै ३५.८३ को नयाँ किर्तिमान कायम गर्नुभएको हो ।

प्रतियोगितामा निसर्ग बाटिका स्कुल टिम च्याम्पियन बनेको छ ।  निसर्गले १० स्वर्ण १० रजत र १३ कांस्य पदकका साथ १०९ अंक हासिल टिम च्याम्पियन बनेको हो । दोस्रो स्थानमा रहेको स्वस्तीश्री गुरुकुलले ९ स्वर्ण १० रजत र ८ कांस्यका साथ ९६ अंक बनायो । लिटल एन्जेल स्कुल १ स्वर्ण ३ रजत र ३ कांस्यका साथ २२ अंक जोड्दै तेस्रो भयो ।