पुरुषोत्तम सुबेदी
पश्चिम नवलपरासी, मङ्सिर ३० गते । पश्चिम नवलपरासी जिल्ला प्रशासन कार्यालयले सेवाग्राहीको सुविधा र सुशासन प्रवर्धनका लागि अब ‘स्वयंसेवक कार्यालय व्यवस्थापन’ को अवधारणा लागू गर्ने तयारी गरेको छ । कार्यालयले अब ‘स्वयंसेवक लेखापढीरहित कार्यालय व्यवस्थापन’ को अवधारणा लागू गर्ने भएको हो । प्रमुख जिल्ला अधिकारी (प्र.जि.अ.) कृष्णप्रसाद लम्सालका अनुसार कार्यालयमा सेवा लिन आउने नागरिकहरूलाई थप सहजता प्रदान गर्न यो योजना अघि बढाइएको हो ।
के हो यो योजना ?
यो व्यवस्थाअन्तर्गत, सेवाग्राहीलाई आवश्यक पर्ने विभिन्न किसिमका निवेदनहरू भर्ने तथा अन्य प्रशासनिक कार्यहरूमा सहयोग गर्नका लागि स्वयंसेवकहरू खटाइनेछ । प्रजिअ लम्सालका अनुसार, यसको मुख्य उद्देश्य सेवाग्राहीहरूलाई बिचौलिया तथा लेखापढीको सहाराविना नै सिधै र सरल तरिकाले सेवा प्राप्त गर्न सक्ने वातावरण सिर्जना गर्नु हो ।
सुशासन र ‘जेनजी’ माग सम्बोधन
हालै देशव्यापी रूपमा उठेको “जेनजी’’ आन्दोलनको क्रममा सुशासनसम्बन्धी उठाइएका मागहरूलाई सम्बोधन गर्ने प्रयास स्वरूप यो पहल गरिएको बताइएको छ । नागरिकहरूले खोजेको सरल, पारदर्शी र झन्झटरहित सेवा प्रवाहलाई सुनिश्चित गर्न प्रशासनले यो कदम चालेको हो ।
स्वयंसेवक व्यवस्थापन
सेवाग्राहीलाई सहयोग गर्ने स्वयंसेवकहरू जिल्लास्थित क्याम्पसहरूका तर्फबाट खटाइने योजना रहेको छ । शैक्षिक संस्थाको सहयोगमा युवा जनशक्तिलाई प्रयोग गरेर प्रशासनिक कार्यमा सहजीकरण गरिनेछ । यसले सेवाग्राहीलाई निवेदन लगायतका कार्यमा आवश्यक सहयोग पुग्ने विश्वास गरिएको छ । जिल्ला प्रशासन कार्यालयको यो तयारीले सार्वजनिक सेवा प्रवाहमा उल्लेख्य सुधार ल्याउने र सुशासनको प्रत्याभूति गराउने अपेक्षा गरिएको छ ।
“नागरिकसँग प्रमुख जिल्ला अधिकारी’’ कार्यक्रम लोकप्रिय
पश्चिम नवलपरासी जिल्लामा प्रमुख जिल्ला अधिकारी (प्रजिअ) कृष्णप्रसाद लम्सालले सुरु गर्नुभएको “नागरिकसँग प्रमुख जिल्ला अधिकारी’’ कार्यक्रमले जनतामाझ निकै लोकप्रियता हासिल गरेको छ । सेवाग्राहीका गुनासा तथा समस्यालाई प्रत्यक्ष सम्बोधन गर्ने यस नयाँ प्रयासले जिल्लाको सेवा प्रवाहमा सुधारको अपेक्षा जगाएको हो ।
जिल्ला प्रशासन कार्यालयका अनुसार, प्रजिअ लम्सालले प्रत्येक दिन बिहान १२ बजेदेखि १२ः३० बजेसम्म हेल्पडेस्कमा स्वयं उपस्थित भई आम नागरिकका गुनासाहरू सुन्ने र तत्काल समाधान गर्न सकिने समस्याहरूको सोही ठाउँबाट समाधानको पहल गर्ने गर्नुभएको छ ।
नागरिकमाझ प्रजिअ जिल्लाको शान्ति सुरक्षा तथा प्रशासन सञ्चालनको प्रमुख जिम्मेवारी सम्हाल्ने प्रमुख जिल्ला अधिकारीबाट नै प्रत्यक्ष रूपमा समस्या सुन्न थालिएपछि सेवा लिन आउने नागरिकहरूमा उत्साह बढेको छ । साना तथा ठूला समस्या लिएर आउने जो कोहीले पनि प्रजिअलाई सिधै भेटेर आफ्ना कुरा राख्न पाएका छन् ।
तत्काल समस्या समाधानको प्रयास प्रजिअ लम्सालले जनताको प्रत्यक्ष सरोकार राख्ने व्यक्तिगत घटना दर्ता, नागरिकता, राहदानी सिफारिस, शान्ति सुरक्षा, सार्वजनिक सेवा प्रवाहमा ढिलासुस्ती जस्ता विषयमा आएका गुनासोहरूलाई गम्भीरतापूर्वक लिएर तत्काल समाधानका लागि सम्बन्धित शाखा वा निकायलाई निर्देशन दिने गरेका छन् । यस कार्यशैलीले कर्मचारीहरूलाई पनि थप जिम्मेवार बन्न प्रेरित गरेको विश्वास गरिएको छ ।
नागरिकहरूले यस कार्यक्रमलाई ‘जनमुखी’ र ‘जवाफदेही’ प्रशासनको उदाहरणका रूपमा लिएका छन् । दैनिक आधा घण्टा समय छुट्याएर प्रजिअले गरेको यो पहलले जिल्ला प्रशासन कार्यालयको सेवा सुधारमा महत्त्वपूर्ण भूमिका खेल्ने र जनताको अपेक्षालाई सम्बोधन गर्ने आशा गरिएको छ ।
