अनिल पराजुली
हेटौँडा, मङ्सिर १४ गते । स्थानीय उत्पादन प्रवर्धन, बजारिकरण तथा कला–संस्कृतिको संरक्षण गर्ने उद्देश्यले सञ्चालन हुने हाट बजार र भर्याङ्ग कालिका मेलाको तयारी तीव्र पारिएको छ । गाउँपालिकाको वडा नम्बर ३, पलाँसेमा मङ्सिर १६ र १७ गते आयोजना हुने कृषि हाट बजार तथा भर्याङ्गकालिका मेलाको तयारी तीव्र पारिएको हो ।
मेला आयोजक समितिका अनुसार मङ्सिर १६ गते कृषि हाट बजार सञ्चालन हुने छ । हाट बजारमा किसानले स्थानीय रूपमा उत्पादन गरेका गेडागुडी, तरकारी, स्थानीय पशुपक्षीको मासु तथा परिकार, विविध स्थानीय खानेकुराहरू प्रदर्शनी तथा बिक्रीका लागि राखिने छन् । स्थानीय उत्पादनका स्टल मेलाको मुख्य आकर्षण हुने जनाइएको छ ।
त्यसैगरी, मङ्सिर १७ गते हुने भर्याङ्गकालिका मेलामा चेपाङ, तामाङ र मगर समुदायका मौलिक नृत्य, बाँसुरीका धुन, पञ्चेबाजा, खैजडी भजन, टुङ्गना र डम्फुका प्रस्तुतिसहित सांस्कृतिक विविधता झल्किने कार्यक्रम तय गरिएको आयोजकले जानकारी दिएको छ ।
मेलामा कलाकार सानु के.सी., स्मृति गौतम, रविन कुमार चेपाङ, गीता तामाङ, उद्धव कार्की, लक्ष्मी दर्नाल, गोकुल ढकाल, बलबहादुर वाइबा लगायतले प्रस्तुति दिनुहुने आयोजकले जनाएको छ ।
-original-thumb.jpg)
