हुम्लामा सर्वसम्मत प्रतिनिधि छनाेट गर्ने प्रयास

राजन रावत

हुम्ला, मङ्सिर १४ गते । नेकपा (एमाले) हुम्लामा एघारौ महाधिवेशन प्रतिनिधि छनाेट कार्य सर्वसम्मत रूपमा छनाेट गर्ने प्रयास जारी राखेको छ । अब चार जना मात्र प्रतिनिधि छनाेट हुन बाँकी रहेको भए पनि आकाङ्क्षी बढी भएपछि छनाेट कार्य लम्बिएको हो । 

देशभर निर्वाचन र सर्वसम्मत रूपमा प्रतिनिधि छनाेट कार्य भइरहेको भए पनि दुई दिन लगातार सहमति गरेर सर्वसम्मत प्रतिनिधि छनाेट गर्ने कार्यले सार्थकता पाउन नसकेको निर्वाचन कमिटीका सदस्य तीर्थराज भण्डारीले बताउनुभयो । खुल्ला दुई जनामा छ जना आकाङ्क्षी छन् । जसमा जिल्ला अध्यक्ष ज्ञामी बुमी, विनोद बोहरा, लोकबहादुर हमाल, उपाध्यक्ष प्रकाशबहादुर शाही, पूर्णप्रसाद ढकाल र नवराज महतारा रहेका छन् । 

उहाँहरू मध्ये जिल्ला अध्यक्ष बुमीलाई प्रतिनिधि छनाेट गर्ने मौखिक सहमति भए पनि त्यसलाई औपचारिकता दिइएको छैन । त्यसैगरी अर्को खुला प्रतिनिधि छनाेटका लागि लोकबहादुर हमाललाई छान्ने कुरा आइरहेको बेला अर्को आकाङ्क्षी विनोद बोहराले नमानेको एमालेका एक नेताले बताउनुभयो । 

निर्वाचन गर्न नदिने र सहमतिकै लागि आकाङ्क्षीहरू बैठक जारी रहेको सचिव तीर्थराज बोहराले बताउनुभयो । ४० वर्षमुनिका युवाबाट र दलित कोटाबाट पर्वत सुनार निर्विरोध चयन भइसक्नु भएको छ । दुई जना महिला प्रतिनिधिका लागि पनि छ जनाको उम्मेदवारी परेको छ । 

जसमा प्रतिमा रावल, मन्जु रावल, बिमला शाही, रूपा शाही, याङ्जु रोकाया र सौमती ऐडी रहेका छन् । महिला प्रतिनिधिमा रूपा शाही र बिमला शाहीका लागि सहमति हुन सक्ने नेताले बताउनुभयो । आकाङ्क्षी महिलाबिच सहमति नभए जिल्ला कमिटीले प्रस्ताव गर्नेगरी तयारी भइरहेको छ । आज बेलुकासम्म एमाले प्रतिनिधि छनाेट कार्य सहमतिमै टुङ्ग्याउने जनाएको छ । प्रतिनिधि छनाेटका लागि दुई हजार १७१ मतदाता रहनु भएको छ ।