टोपलाल अर्याल
रेसुङ्गा(गुल्मी), मङ्सिर १४ गते । गुल्मीको सत्यवति गाउँपालिका–३ ठुलोलुम्पेक बोरहका इन्द्र विश्वकर्मा र प्रेमकला गाहाले करिव पाँच लाख प्याजका बेर्ना बेच्दै हुनुहुन्छ । अहिले प्याज लगाउने मौसम सुरु भएको छ । दम्पत्तिले स्थानीय तथा बाहिरका बजारमा समेत पठाउने गरेर प्याजका बेर्ना लगाउनुभएको थियो ।
मूल्य कम परेपनि धेरै बेच्दा राम्रो आम्दानी हुने गरेको छ । अहिले प्याजका बिरुवा दुई रुपियाँमा बिक्री हुने गरेको प्रेमकलाले बताउनुभयो । बिरुवा आफैँमा संवेदनशिल हुने भएकाले धेरै टाढा लैजान मुस्किल पर्छ । मोटरसाइकलमा बोकेर स्थानीय र बाहिरी बजारसम्म पुग्ने गरेको ईन्द्र विश्वकर्माले बताउनुभयो ।
उहाँले अहिलेसम्म दुई लाख बिरुवा बेचेको बताउनुभयो । इन्द्र दम्पत्तिको कृषि मोह निकै लोभ लाग्दो छ । प्रेमकला आफैँ पनि जनप्रतिनिधि हुनुहुन्छ । तर पनि श्रीमान इन्द्रसँग घरमा फर्सुद निकालेर काम गरेकाले राम्रो कृषी उत्पादन भइरहेको छ ।
उहाँहरुको बारीमा अहिलेकै सिजनमा आठ हजार गोपी थिए । जसबाट २५ क्वीन्टल गोपी बिक्री भएको छ । गोपी बाहेक अहिलेनै सय क्वीन्टल बढी तरकारी बिक्री भएको विश्वकर्माले बताउनुभयो ।
इन्द्र कामकै लागि मलेसिया र भारत पुग्नुभयो । ०७२ सालमा घर फर्किएर तीन वर्ष गाउँमै बस कुँदाउँदा पनि सोँचे अनुसारको कमाइ भएन । पछिल्ला डेढ दशक कृषिमा बिते । तर पूर्णिमा अर्गानिक कृषि तथा पशुपंक्षी फर्ममार्फत पाँच वर्षदेखि मात्रै व्यवसायीक कृषि गरिरहनुभएको छ । विश्वकर्माले अहिले क्याप्सिकम, सीमी र काँक्रासहित कुखुरापालन व्यवसाय गरिरहनुभएको छ ।
इन्द्रको बारीमा सिमी पनि राम्रो फल्यो । सिमीकै मौसम भएकाले मूल्य सोँचे अनुसार भएन् । तर करि १५ क्वीन्टल सिमी र क्याप्सिकम बिक्री भयो । धेरै पहिलेबाट टमाटर खेती गरिरहनु भएका विश्वकर्माकाले अहिले मात्रै करिव ७० क्वीन्टल टमाटर बिक्री भएको दाबी गर्नुभयो । विश्वकर्माकोमा भक्तपुरे जातको काँक्राका पनि साढे दुई सय बोट थिए । टमाटर, सिमी, क्याप्सिकम र काँक्रा गरेर एक टनभन्दा बढी बिक्री गरेको कृषक इन्द्र विश्वकर्माले जानकारी दिनुभयो ।
२०७९ सालमा असिनाले ध्वस्त बनाएपछि कृषि कर्मबाट हात धुने स्थिति समेत भोग्नु भएका इन्द्रले पाँच लाख खर्च गरेर हेल्दी नेट प्रयोग गरेर कृषि गरिरहनु भएको छ । हेल्दीनेट महङ्गो हुने भएकाले सवै कृषकको पहुँचमा छैन ।
इन्द्र दम्पत्तिले कृषि बाहेक आठ सय बढी कुखुरा, १० बाख्रासहित बंगुर पालन गर्नुभएको छ । श्रीमती प्रेमकला गाहा सत्यवति गाउँपालिका–३ को वडासदस्य हुनुहुन्छ । उहाँले वडाको कामसहित श्रीमानसँगै कृषि कर्ममा जोडिनु भएको छ । गाउँभर कृषि क्षेत्रमा उर्जा छ । अरुलाई कृषिमा लाग्न उत्प्रेरित गर्न आफुबाट सुरु गर्नुपर्ने गाहाको तर्क छ । सत्यवति गाउँपालिकाले कृषकका सबै उत्पादन बुटवलको २८ नं सटरमा बिक्री गर्ने प्रबन्ध गरिरहेको छ ।
सवै उत्पादन अहिलेसम्म बुटवलमै बिक्री भइरहेको गाहाले बताउनुभयो । उहाँले खर्च कटाएर परदेशमा बराबर कमाई घरमै भइरहको बताउनुभयो । कृषि ज्ञान केन्द्रबाट थोपा सिँचाइ प्रविधि, पालिका तथा वडाबाट गत वर्ष टनेल सहयोग भएको थियो । उहाँले वर्षातमा पानी परे सडक समस्या हुने भएकाले राज्यले सडक सञ्चालनमा सहयोग गर्नुपर्ने आशा व्यक्त गर्नुभयो ।
