सिराज खान
नेपालगन्ज, मङ्सिर १४ गते । नेपालगन्जमा सम्पन्न भएको पहिलो बाँके जिल्लास्तरीय ‘नेपालगन्ज पम्प ट्रयाक च्यालेन्ज’ प्रतियोगितामा मास्टर क्याटेगरीतर्फ गगनसिंह थापाले प्रथम स्थान हासिल गर्नु भएको छ ।
सो क्याटेगरीमा दिपक मल्ल द्वितीय, जन्गु चोधरी तेस्रो र विशाल श्रेष्ठले चौथो स्थान प्राप्त गर्नुभयो । यसैगरी, इलाइट क्याटेगरीमा बिरेन्द्र धोबी प्रथम हुँदा अनस खान दोस्रो, अनमोल गुप्ता तेस्रो र रोहित चौहान चौथो हुनुभयो ।
जुनियर ए क्याटेगरीतर्फ अनिश चौधरी प्रथम, सुशंग धरकटवा दोस्रो, अंशु गुप्ता तेस्रो तथा रणबिर थारु चौथो हुनुभयो । यसैगरी, जुनियर बी क्याटेगरीमा अभिजंग थापा प्रथम, आदित्य मल्ल दोस्रो, राजन शाही तेस्रो र सौरभ सोन्कर चौथो हुनुभएको छ ।
जुनियर सी क्याटेगरीमा सुप्रभात केसी प्रथम, अर्जित बर्मा दोस्रो, कौस्तुब चलाउने तेस्रो तथा शाश्वत केसीले चौथो स्थान प्राप्त गर्नुभयो ।
साइकलिष्टहरूले देउसी भैलो खेलेर सङ्कलन गरेको रकमबाट सो प्रतियोगिता आयोजना गरिएको देउसीभैली समूहका संयोजक कविराम बुढाथोकीले बताउनुभयो ।
नेपालगन्जमा देशकै दोस्रो तथा ठूलो पम्प ट्रयाक निर्माण भएको करिब दुई वर्षपछि पहिलोपटक औपचारिक प्रतियोगिता सञ्चालन गरिएको कार्यक्रम संयोजक गगन थापाले बताउनुभयो ।
उहाँका अनुसार युवा तथा बालबालिकालाई खेलमा प्रोत्साहन गर्ने उद्देश्यले प्रतियोगितामा चार वटा उमेरगत विधा तथा बाँकेका भेट्रान खेलाडीहरूका लागि एक अतिरिक्त विधा समावेश गरिएको थियो ।
प्रतियोगिताको व्यवस्थापकीय जिम्मेवारी नेपालगन्ज बाइसाइकलले गरेको थियो भने प्राविधिक सहकार्य जिल्ला साइक्लिङ संघ बाँकेले गरेको थियो ।
