तनहुँमा राष्ट्रिय परिचयपत्र सेवा पूर्ववत् समयमा

अमरराज नहर्की
तनहुँ, मङ्सिर १४ गते । जिल्ला प्रशासन कार्यालय तनहुँले राष्ट्रिय परिचयपत्र सेवा अब आइतबारदेखि पुनः पूर्ववत् कार्यालय समयमा सञ्चालन भएको छ । सेवाग्राहीको भीड, उपकरण अभाव र भवन क्षतिका कारण बाध्यतावश १० घण्टासम्म सेवा पु¥याउँदै आएको प्रशासन अब पुनः नियमित लयमा फर्किएको हो ।

प्रशासकीय अधिकृत विकास श्रेष्ठका अनुसार हाल सेवाग्राहीको चाप उल्लेखनीय रूपमा कम भएको छ र कार्यालयमा तीनवटै स्टेशन पूर्ण क्षमतामा सञ्चालनमा आइसकेकाले अब सेवा बिहान १० देखि साँझ ४ बजेसम्म नियमित रूपमा उपलब्ध गराइनेछ । ‘‘अहिलेको अवस्थाले देखाइदिएको छ-पूर्ववत् कार्यालय समयमै सेवाग्राही सहज रूपमा व्यवस्थापन गर्न सकिनेछ,’’ श्रेष्ठले जानकारी दिनुभयो ।

गत भदौ २३ र २४ गतेको जेनजी आन्दोलनलगतै प्रशासन भवनमा तोडफोड तथा आगजनी हुँदा राष्ट्रिय परिचयपत्र सम्बन्धी सम्पूर्ण उपकरण जलेर नष्ट भएका थिए । उपकरण अभाव, सीमित स्टेशन र सेवा लिन आउनेहरूको भीड एकैपटक बढेपछि कार्यालयले समयमै काम सम्पन्न गर्न बिहान ८ देखि बेलुका ६ बजेसम्म सेवा विस्तार गरेको थियो ।

राष्ट्रिय परिचयपत्र तथा पञ्जिकरण विभागबाट नयाँ उपकरण चरणबद्ध रूपमा उपलब्ध भएपछि कार्यालयले पुनः दुईवटा स्टेशनमार्फत सेवा सुरु गर्यो । हाल तेस्रो स्टेशन पनि सञ्चालनमा आएपछि सेवाप्रवाह सहज बनेको प्रशासनले जनाएको छ ।

श्रेष्ठले प्रकाशित सूचनामार्फत भनेका छन्, ‘‘पूर्ववत् समयमा सेवा प्रवाह हुँदा सेवाग्राहीलाई अनावश्यक भीड, लामो लाइन र समय खर्च गर्नुपर्ने अवस्थाबाट मुक्त गराउने अपेक्षा छ ।’’ प्रशासनले सेवा नियमित हुँदा परिचयपत्र वितरण, बायोमेट्रिक दर्ता तथा अभिलेख अद्यावधिकजस्ता कार्यहरू अब सहज र छिटो हुने विश्वास व्यक्त गरेको छ । नियमित समयमा फर्किएको सेवा व्यवस्थाले जिल्ला प्रशासन पुनः सामान्य कार्यसञ्चालनतर्फ उन्मुख भएको सङ्केत दिएको छ ।