गाईघाट समाचारदाता
गाईघाट, मङ्सिर १४ गते । उदयपुरको सदरमुकाम गाईघाटस्थित त्रियुगा नगरपालिकाका विभिन्न सडकमा कालोपत्रे गर्न सुरु गरिएको छ । वर्षाैंदेखि हिलो र धुलोको सास्ती हुने गरेको गाईघाट बजार क्षेत्रको झन्डै १५ किलोमिटर सडकमा कालोपत्रे गर्न सुरु गरिएको हो ।
विश्व बैङ्कको आर्थिक सहयोग र नेपाल सरकारको कार्यान्वयन योजना अन्तर्गत करिब ६६ करोड रुपियाँको लागतमा निर्माणाधीन विभिन्न नौ वटा स्थानीय सडकमा ४० एमएम मोटाइरहेको उच्च गुणस्तरको अस्फाल्ट कङ्व्रिmटको कालोपत्रे सुरु गरिएको त्रियुगा नगरपालिकाका इन्जिनियर शैलेन्द्रकुमार मण्डलले बताउनुभयो ।
विश्व बैङ्कले नेपाल सरकार सहरी विकास मन्त्रालयमार्फत ‘सहरी सुशासन तथा पूर्वाधार सुधार कार्यव्रmम’ (युजिआइपी) अन्तर्गत त्रियुगा नगरपालिकाका वडा नं १०, ११, १२ र १३ समेतका चार वटा वडालाई जोड्ने गरी निर्माणाधीन विभिन्न नौ वटा सडकमा कालोपत्रे गर्न सुरु गरेको हो ।
नगरको महìवपूर्ण सहरी क्षेत्र गाईघाट बजारको विकासमा सहयोग पुग्ने उक्त सडक निर्माणका लागि विश्व बैङ्कले उपलब्ध गराएको आर्थिक सहयोगलाई नगरले गौरवको आयोजनाका रूपमा लिएर काम अघि बढाएकोमा अनेकौँ उतारचडावकाबिच शुव्रmबारबाट पिच गर्ने काम सुरु भएको नगरप्रमुख वसन्तकुमार बस्नेतले बताउनुभयो ।
नगरभित्र पर्ने दुई वटा ठुला सडक मदन भण्डारी र सगरमाथा राजमार्गलाई जोड्दै बजार क्षेत्रका महìवपूर्ण सडक एकआपसमा जोडिने गरी निर्माण गरिएको झन्डै १५ किमी सडकमा अस्फाल्ट प्रविधिको कालोपत्रे सम्पन्न भएपछि गाईघाट बजार अब धुलो र हिलोमुक्त सहरमा परिणत हुने निश्चित भएको नगरप्रमुख बस्नेतले बताउनुभयो ।
ती चार वटा वडाका नौ वटा सडकलाई दुई प्याकेज गरी टेन्डर आह्वान गरिएको थियो । पहिलो प्याकेजमा करिब १० किलोमिटर सडक र दोस्रो प्याकेजमा करिब पाँच किलोमिटर सडक निर्माण गर्ने गरी आशिष–आशिर्वाद–स्वामी नारायण जेभी निर्माण कम्पनीसँग भ्याटसहित ६६ करोड ११ लाख १४० रुपियाँमा ठेक्का लगाइएको र सो अनुसार निर्माणको काम धमाधम भइरहेको उहाँले बताउनुभयो ।
