.jpg)
गुलरिया समाचारदाता
गुलरिया (बर्दिया), मङ्सिर १४ गते । बर्दियाको बाँसगढी नगरपालिकाले बर्दिया जिल्लाभरिको पानी परीक्षणको सुरुवात गरेको छ । परीक्षण गरिएका पानीका स्रोतमध्ये करिब ७० प्रतिशत पानी मापदण्ड अनुसार पिउन अयोग्य देखिएको छ ।
विगत एक महिनादेखि बाँसगढी नगरपालिकाभित्र १२३ र जिल्लाका अरू पालिकाभित्रका ३८ गरी १६१ वटा ट्युबेललगायतका पानीका स्रोतको परीक्षण गरिएको छ । बाँसगढी नगरपालिकाका स्वास्थ्य अधिकृत घनश्याम केसीले इकोली, पिएचलगायतका छ वटा पारामिटर जाँच गरिएको बताउनुभयो । उहाँले भन्नुभयो, “सरकारले तोकेको मापदण्ड हेर्ने हो भने परीक्षण गरिएकामध्ये ७० प्रतिशत ट्युबेलको पानी पिउनै नमिल्ने देखिएको छ । उहाँका अनुसार यहाँको पानीमा हैजा तथा पखाला लाग्ने कीटाणु ‘इकोली’ बढी पाइएको छ । पानीमा यस्तो खालका समस्या देखिएपछि तत्काललाई क्लोरिनको प्रयोग, बायोस्यान्ड फिल्टरको प्रयोग गर्न स्थानीयलाई सुझाव दिने गरेको बताउनुभयो ।
हालसम्म नगरपालिकाभित्रका विद्यालय, स्वास्थ्य संस्था, वडा कार्यालय खेल मैदानलगायतका सार्वजनिकस्थलमा भएका ट्युबेलको पानी परीक्षण गरिएको छ । केही स्थानीयले व्यक्तिगत रूपमा पानी परीक्षण गर्नका लागि ल्याउन सुरु गरेका छन् । बाँसगढी नगरपालिकाबाहेकका र व्यक्तिगत रूपमा पानी परीक्षण गराउँदा ५१५ रुपियाँ राजस्व लिने गरिएको छ । जिल्लाभित्रै सरकारी दररेटमा पानी परीक्षण गर्ने भएपछि अरू नगरपालिकालाई पनि सहज भएको छ । सार्वजनिकस्थलमा पानी परीक्षणका लागि फिल्डमै प्राविधिक टोली जाने गरेको छ भने व्यक्तिगत र अरू नगरपालिकाको पानी ल्याबमै पु¥याउने गरेका छन् ।
नगरप्रमुख खडकबहादुर खड्काले नगरपालिकाभरिको पानीको अवस्था पत्ता लगाउनका लागि सुरुमा सार्वजनिकस्थलमा पानी परीक्षणको सुरुवात गरिएको बताउनुभयो । उहाँले सुरुमा पानीको अवस्था पत्ता लगाएपछि त्यसलाई शुद्धीकरण गर्ने वा अरू स्रोतको पानी प्रयोग गर्ने भन्नेबारे योजना बनाउने बताउनुभयो । पानी परीक्षण सँगसँगै तत्काल वैकल्पिक तरिका जस्तो बायोस्यान्ड फिल्टर र क्लोरिनको प्रयोगमा जोड दिने र दीर्घकालीन रूपमा शुद्ध खानेपानी पु¥याउने योजना रहेको नगरप्रमुख खड्काको भनाइ छ ।
