रणनीतिक सडकलाई छैन बजेट

बागलुङ समाचारदाता

बागलुङ, मङ्सिर १४ गते । बजेट अभावमा एक निर्वाचन क्षेत्र, एक रणनीतिक सडक अन्तर्गत बागलुङमा निर्माणाधीन दुई सडकको काम अलपत्र परेको छ । बागलुङको क्षेत्र नं. १ अन्तर्गत अदालत चौपारीदेखि सिगाना हुँदै बरेङ जोड्ने सडक र क्षेत्र नं. २ अन्तर्गत गलकोटको हरिचौरदेखि मल्म हुँदै पाण्डवखानी जोड्ने सडकको काम अलपत्र परेको हो ।

अदालत चौपारीदेखि सिगाना–बरेङ जोड्ने सडकको काम सिगानाको वडा कार्यालयमा पुगेर रोकिएको छ । उक्त खण्ड निर्माण सम्झौता गरेका ठेकेदारले समयमा रकम भुक्तानी नपाएपछि काम अलपत्र भएको थियो ।

सदरमुकाम बागलुङ बजारदेखि १० किलोमिटर खण्डमा काम गरेको ठेकेदार कम्पनी कर्ण बिल्डर्सले बल्लतल्ल भुक्तानी पाएको बताएको छ । वडा कार्यालयदेखिको खण्ड निर्माणका लागि सडक कार्यालयले ठेक्कासमेत लगाउन सकेको छैन । पर्याप्त बजेट अभावले भएका योजनासमेत फिर्ता गरेको सरकारले रणनीतिक सडक कहिले पूरा गर्ने भन्ने चिन्ता स्थानीयमा छ । 

त्यसै गरी निर्वाचन क्षेत्र नं. २ अन्तर्गतको हरिचौरदेखि मल्म हुँदै पाण्डवखानी जोड्ने सडकको पहिलो खण्डको ठेक्कासमेत पूरा हुन सकेको छैन । अहिले केही काम भएको देखिए पनि पूरा हुने/नहुनेमा स्थानीय विश्वस्त हुन सकेका छैनन् । यो सडकको म्याद थप भएपछि मात्र ठेकेदार कम्पनीले आठ किलोमिटर सडकखण्डमा काम थालेको छ । तोकिएको समयमा २५ प्रतिशत मात्रै काम गरेको ठेकेदारले अहिले भने पाँच किलोमिटर सडक कालोपत्रे गर्ने लक्ष्य राखेको छ । केही समय अघिदेखिनै काम थालेर ७० प्रतिशत भौतिक प्रगति गरेको वल्र्ड वाइडर पूर्ण संयुक्त निर्माण कम्पनीले जनाएको छ । कहीँ ढलान भइसकेको छ भने कहीँ सडक कालोपत्रे गर्ने तयारी गरिरहेको कम्पनीले दाबी गरेको छ । 

यसअघि समयमा रकम भुक्तानी नपाउँदा ठेकेदारले काम छाडेको थियो । काम गरेको साढे तीन करोड रुपियाँ भुक्तानी नपाएपछि ठेकेदारले अघिल्लो वर्ष काम छाडेपछि म्याद सकिएको थियो । म्याद थपसँगै रकम पाउने प्रतिबद्वतापछि काम सुरु भएको हो । इन्जिनियर सागर भण्डारीले आगामी वैशाखसम्म काम सक्ने योजना रहेको बताउनुभयो । २०७९ को भदौमा यो सडकको २५ करोड २० लाखमा ठेक्का सम्झौता भएको थियो ।

त्यसै गरी कुश्मीसेरा–बरेङ जोड्ने रणनीतिक सडकमा पनि ठेकेदारले काम अलपत्र छाडेपछि स्थनीय आक्रोशित छन् । उपभोक्ताले सङ्घर्ष समिति बनाएर मुख्यमन्त्री गुहारेपछि बजेटको सुनिश्चित भएको थियो । अहिले काम सुरु भएको यो सडकको नाम्दुकदेखि बरेङसम्म कालोपत्रे भइसकेको छ भने कुश्मीसेरादेखि राङखानीसम्म गर्ने तयारी भइरहेको छ । बजेट अभावले तमानखोलाको बोङ्गादोभान–सोलेडाँडा जोड्ने सडकमा काम हुन सकेको छैन ।