मनासलु पदमार्ग मर्मतसम्भार

सुलीकोट समाचारदाता

सुलीकोट, मङ्सिर १४ गते । उत्तरी गोरखाको चुमनुब्री गाउँपालिका लोक्पाथाङाको मनासलु पदमार्ग मर्मत कार्य सम्पन्न भएको छ । चुमनुब्री गाउँपालिका, मनासलु संरक्षण क्षेत्र, स्थानीय बासिन्दा र जनप्रतिनिधिको सक्रिय सहभागितामा लोक्पाथाङाबाट बाजेखोलासम्मको मनासलु पदमार्ग निर्माण समपन्न भएको हो । 

उच्च हिमाली क्षेत्रका कारण हरेक वर्ष मनसुनको समयमा पहिरो, भूस्खलन तथा बाटो भत्किने समस्या यस क्षेत्रका मुख्य चुनौतीका रूपमा रहेको मनासलु संरक्षण क्षेत्र आयोजना कार्यालय गोरखाका प्रमुख सन्तोष शेरचनले जानकारी दिनुभयो ।  

मनासलु क्षेत्रमा पर्यटकीय मौसममा आन्तरिक तथा बाह्य पर्यटकको घुइँचो लाग्ने गर्छ । चुमनुब्री गाउँपालिकाका अध्यक्ष निमा लामाले भन्नुभयो, “मनासलु क्षेत्र पुग्ने मुख्य पदमार्ग लोक्पाथाङा भएकाले पदमार्गका कारण पर्यटक तथा स्थानीयले दुःख भोग्न नपरोस् भनेर गाउँपालिकाले हरेक वर्ष पदमार्ग मर्मत तथा सुधारका लागि काम गर्दै आएको छ ।” 

पहिरोले लोक्पाथाङाबाट बाजेखोलातर्फ झन्डै आधा घण्टाको पैदलमार्गका धेरै स्थानमा पदमार्ग अवरुद्ध भएको थियो भने पहिरोका कारण बाटो साँघुरो भएर जोखिम बढ्ने, माथिबाट खसेका ढुङ्गाले गर्दा हिँडडुल गर्न कठिन भएपछि पदमार्ग मर्मत तथा निर्माण गर्न एक हप्ता लागेको पालिका अध्यक्ष निमा लामाको भनाइ छ । 

पदमार्ग मर्मतपछि पहिलेभन्दा सुरक्षित, फराकिलो र उपयोगमैत्री भएको स्थानीय शेराप गुरुङले बताउनुभयो । पदमार्ग निर्माण सम्पन्न भएपछि दैनिक सयौँ पर्यटक, विद्यार्थी, बिरामी तथा स्थानीयलाई हिँडडुल गर्न राहत मिलेको उहाँले बताउनुभयो । 

चुमनुब्री गाउँपालिकाका अध्यक्ष लामाका अनुसार मनासलु क्षेत्र पुग्ने पर्यटकका लागि अझ थप संरचना निर्माणको योजना अघि बढाई मनासलु क्षेत्रमा बढ्दो पर्यटकीय आकर्षण, सुरक्षा तथा आर्थिक गतिविधिमा सहज बनाउन पदमार्गको नियमित मर्मत गर्दै आएको दाबी गर्नुभयो । 

मनासलु क्षेत्रको पदमार्ग सहज भएमा पर्यटकको सङ्ख्या बढेसंगै उत्तरी गोरखावासीको आम्दानीको  स्रोत पनि बढ्ने भएकाले दैनिक जीवन तथा स्थानीय अर्थतन्त्रमा सकारात्मक प्रभाव पार्ने विश्वास गाउँपालिकाले लिएको छ ।