पर्यटकको रोजाइमा मिनी ग्रेटवाल

चरीकोट समाचारदाता  

चरीकोट, मङ्सिर १४ गते । शैलुङ गाउँपालिकामा निर्माणाधीन शैलुङ मिनी ग्रेटवालप्रति पर्यटकको आकर्षण वढ्दै गएको छ । शैलुङडाँडामा फैलिएको ग्रेटवालमा हिँड्दै हिमाल र शैलुङको सौन्दर्य नियाल्न पर्यटक लोभिने गरेका छन् । 

केही वर्षयता शैलुङ भ्रमण गर्ने पर्यटकको सङ्ख्यामा उल्लेखनीय वृद्धि भएको शैलुङ गाउँपालिकाका अध्यक्ष रिमालबाबु श्रेष्ठले जानकारी दिनुभयो । ग्रेटवालमा हिँड्नुका साथै ध्यान, अध्ययन, अनुसन्धान र अवलोकनको उद्देश्यले समेत स्वदेशी तथा विदेशी पर्यटक आउने गरेका छन् । शैलुङमा खासगरी बिदाका दिन पर्यटकको भिड देखिन्छ । संस्कृति, पर्यटन तथा नागरिक उड्डयन मन्त्रालय र शैलुङ गाउँपालिकाको संयुक्त लगानीमा शैलुङमा मिनी ग्रेटवाल निर्माण गरिएको उहाँले बताउनुभयो । 

सङ्घीय सरकारको ७० प्रतिशत र गाउँपालिकाको ३० प्रतिशत लगानीमा यो परियोजना अघि बढाइएको हो । प्रारम्भिक चरणमा पाँच सय मिटर लम्बाइको ग्रेटवाल निर्माणका लागि चार करोड ९४ लाख १५ हजार ४१८ रुपियाँ खर्च गरिएको गाउँपालिकाले जनाएको छ । शैलुङ गाउँपालिकाको कालापानीदेखि डाँफेढुङ्गासम्म एक किलोमिटर लामो ग्रेटवाल निर्माण गरिने योजना छ । बागमती प्रदेश सरकारले ग्रेटवाल निर्माण र पर्यटन प्रवर्धनका लागि एक करोड ८० लाख रुसपियाँ विनियोजन गरेको अध्यक्ष श्रेष्ठले जानकारी दिनुभयो ।  शैलुङ ग्रेटवाल र वरपरको प्राकृतिक दृश्यावलोकनले विदेशी पर्यटकलाई पनि आकर्षित गरिरहेको छ । धेरै जसो विदेशी नागरकिले शैलुङडाँडाको भ्रमणलाई आफ्नो वार्षिक तालिकामा समावेश गर्न थालेका छन् । सङ्घीय सरकारले सहयोग गर्ने हो भने गाउँपालकिाले शैलुङलाई राष्ट्रिय तथा अन्तर्राष्ट्रियस्तरको प्रमुख पर्यटकीय केन्द्रका रूपमा उभ्याउने उद्देश्यसहित परियोजना अघि बढाएको गाउँपालिकाले जनाएको छ ।

काठमाडौँबाट सिन्धुपाल्चोकको मुडे हुँदै मिनी ग्रेटवालबाट शैलुङडाँडा पुग्न सकिन्छ । बाटोको सुधार र विस्तारसँगै शैलुङसम्मको यात्रा सहज र रमणीय बन्दै गएको छ । यहाँबाट देखिने हिमाल, हरियाली, स्थानीय बस्ती, धार्मिकस्थल र सांस्कृतिक अनुभवले यात्रालाई अझ स्मरणीय बनाइदिने पर्यटकले जनाएका छन् ।

शैलुङ ग्रेटवालले दोलखाको पर्यटन क्षेत्रलाई नयाँ आयाम दिएको छ । यसले केवल भौतिक संरचना निर्माण मात्र होइन, स्थानीय आर्थिक गतिविधि, होटेल व्यवसाय, यातायात र हस्तकलामा समेत वृद्धि गरिरहेको गाउँपालिकाले जनाएको छ । स्थानीय सरकार र सङ्घीय सरकारको सहकार्यमा अघि बढिरहेको यो परियोजना पूरा भएपछि शैलुङ धार्मिकस्थल मात्र होइन, राष्ट्रिय तथा अन्तर्राष्ट्रिय पर्यटकीय गन्तव्यका रूपमा स्थापित हुने स्थानीय जनप्रतिनिधिको विश्वास छ ।