बसपार्क निर्माणमा ढिलाइ

तानसेन समाचारदाता 

तानसेन, मङ्सिर १३ गते । पछिल्लो समय तानसेन नगरपालिकाले गौरवको आयोजनाका रूपमा अगाडि सारेको बसपार्क निर्माणका काममा पनि ढिलाइ भएको छ । निर्माण व्यवसायी र नगरपालिकाका कारण बसपार्क निर्माणले गति लिन सकेको छैन । 

बसपार्क निर्माण सम्पन्न हुने म्याद सकिएको छ महिना बितिसकेको छ तर हालसम्म ६० प्रतिशत मात्र काम भएको तानसेन नगरपालिकाका इन्जिनियर रामप्रसाद श्रेष्ठले बताउनुभयो । सुरुमा नगरपालिकाले नै प्राविधिक डिजाइन परिवर्तन गरेकाले निर्माणको काममा ढिलाइ भएको थियो । अहिले निर्माण व्यवसायीका कारण काम म्याद थप गर्नुपर्ने बाध्यता छ । 

बसपार्कको पहिलो चरणको काम १८ महिनाभित्र सकिने गरी २०८० वैशाख ७ गते स्यम्भु–रेड–हमाल प्रालिसँग ठेक्का सम्झौता भएको थियो । बसपार्क निर्माणका लागि नगर विकास कोषको ७० प्रतिशत र तानसेन नगरपालिकाको आन्तरिक स्रोत २५ प्रतिशत गरी कुल १८ करोड ३२ लाखमा ठेक्का सम्झौता भएको थियो । नयाँ प्रविधिबाट बसपार्क निर्माण थालेकाले समस्या आइरहेको नगरपालिकाले जनाएको छ । इन्जिनियर श्रेष्ठले डिजाइन र प्राविधिक समस्याले सोचे अनुसार काममा प्रगति हुन नसकेको बताउनुभयो । 

निर्माण व्यवसायीका अनुसार हाल बलियो माटोको पर्खाल (आरई वाल) जडानका काम सकिने क्रममा छ । आरई वाल रूपन्देहीको मणिग्राममा निर्माण गरेर तानसेन ल्याइएको छ । सम्झौता अनुसार १८ बस अट्ने क्षमताको टर्मिनल, व्यवसाय प्रयोजनका लागि तीन सटर, एक सार्वजनिक शौचालय, प्रशासनिक भवन र पार्क निर्माण हुने छ । दोस्रो चरणमा व्यवस्थित बसपार्कसहित पेट्रोल पम्प, अटोभिलेज, सुपरमार्केटको समेत प्रस्ताव गरिएको छ । व्यवस्थित बसपार्क काठमाडौँ नया“ बसपार्कको मोडलमा निर्माण हुने बताइएको छ । 

यही गतिमा काम गरे बसपार्क निर्माण सम्पन्न गर्न अझै एक वर्ष बढी लाग्ने स्थानीय बासिन्दाको चिन्ता छ । स्थानीय बासिन्दा विदुर घिमिरेले तानसेनका अरू योजना जस्तै बसपार्कको निर्माण कार्यमा ढिलाइ भएको बताउनुभयो । उहाँले नगरपालिका र निर्माण व्यवसायीले बसपार्क समयमै बनाउन नसक्दा नगरको विकासे योजनाप्रति नकारात्मक धारणा बढ्दै गएको बताउनुभयो ।

नगरपालिकाका अनुसार निर्माण व्यवसायीले हालसम्म सात करोड ८० लाख भुक्तानी लिइसकेको छ । नया“ बसपार्कको काममा ढिलाइ भएपछि कामलाई गति दिन माग गर्दै वडाध्यक्ष रामबहादुर रावलको नेतृत्वले नगरपालिकामा ज्ञापनपत्र बुझाएको छ । तानसेन नगरपालिकाले भने अब बसपार्कको कामले गति लिने दाबी गरेको छ । नगरपालिकाका प्रमुख सन्तोषलाल श्रेष्ठले बसपार्कको डिजाइन र निर्माणको काम एउटै कम्पनीले गरेकाले अबदेखि कामले गति लिने उल्लेख गर्नुभयो ।