बेनी सामुदायिक र केबि एकेडेमी जेसीजकपको फाइनलमा

अमृतप्रसाद पौडेल
म्याग्दी, मङ्सिर १३ गते । बेनी नगरपालिका ७ मा रहेको बेनी सामुदायिक मावि र मालिका गाउँपालिका ६ दरवाङको केबि एकेडेमी म्याग्दी सदरमुकाम बेनीमा जारी २३ औँ अन्तर मावि. जेसीजकप फुटवल प्रतियोगिताको फाइनलमा पुगेका छन् ।

शुक्रबार भएको सेमीफाइनलमा किसानी माध्यमिक विद्यालय धारापानीलाई एक शून्य गोल अन्तरले पराजित गर्दै बेनी सामुदायिक माध्यमिक विद्यालयले फाइनलमा स्थान बनाएको हो ।

त्यसैगरी केबी एकेडेमी र लिटिल गार्डेन एकेडेमीबिचको खेल निर्धारीत समयमा एकएकको बराबरीमा टुङ्गीएपछि भएको टाइब्रेकरमा चार एक गोल अन्तरले पराजित गर्दै केबी एकेडेमी फाइनलमा प्रवेश गरेको हो ।

यस पटक फाइनल पुग्ने दुबै टोली नयाँ हुन् । यस अगाडीका बिजेताहरु क्वाटर फाइनल सम्म आइपुगे पनि त्यो भन्दा अगाडी जान सकेनन् । जेसीजकप फुटबल प्रतियोगितामा यस अगाडी बेनी बोर्डीङ, माउण्ट एभरेष्ट आवासिय मावि, न्यू वेष्ट प्वाइन्ट अवासीय मावि, शारदा मावि, प्रकाश माविले उपाधि जितेका थिए ।

जिल्ला सदरमुकाम भन्दा बाहिरको शारदा माध्यमिक विद्यालय मंगला गाउँपालिका ५ छिस्वाङले मात्रै उपाधी जितेको थियो । एउटा संस्करण सदरमुकाम बाहिरको शारदा माध्यमिक विद्यालयले जित्दा अन्य २१ संस्करणको उपाधी सदरमुकाम बेनी कै विद्यालयले जितेका थिए । यस अगाडिका २२ वटा संस्करणको उपाधी पाँच वटा विद्यालयले जितेका थिए भने यस पटकको उपाधी बिजेता टिम छैँटौं हुनेछ ।

मङ्सिर १३ गते शनिबार सकिने यो प्रतियोगितामा जिल्ला भित्रका १९ विद्यालयको सहभागिता रहेको प्रतियोगिताका मुल संयोजक नविन पौडेलले जानकारी दिनुभयो ।

प्रतियोगितामा प्रथम हुनेले रनिङ शिल्डसहित ट्रफी, मेडल, प्रमाणपत्र सहित नगद ५५ हजार पाँच सय ५५ र उपबिजेताले ट्रफि, मेडल र प्रमाणपत्र सहित नगद ३५ हजार पाँच सय ३५ पुरस्कार प्राप्त गर्ने शाखा अध्यक्ष बिनोद घर्तीले बताउनुभयो ।

प्रतियोगितामा उत्कृष्ट खेलाडी, सर्वाधिक गोलकर्ता, उत्कृष्ट गोलरक्षक, उत्कृष्ट स्ट्राइकर, उत्कृष्ट डिफेन्डर, उत्कृष्ट मिडफिल्डर, राइजीङ प्लेयर, उत्कृष्ट प्रशिक्षकलाई नगद २ हजार पाँच सयसहित ट्रफि प्रदान गरिने छ । त्यस्तै, अनुसासित टिम र सेमिफाइनल पुग्ने दुई टिमलाई नगद पाँच हजारसहित सम्मान गरिने छ । प्रतियोगिता सञ्चालनका लागि एभरेष्ट ग्लोबल एजुकेसन भिसा सर्भिस मुख्य प्रायोजक रहेको छ भने गंगा जिसी फाउण्डेसन र प्रभु बैँक सहप्रायोजकको रुपमा रहेका छन् ।