राधाकृष्ण डुम्रे
वालिङ(स्याङ्जा), मङ्सिर १३ गते । जिल्ला प्रहरी कार्यालय स्याङ्जाले एक जना फरार प्रतिवादीलाई ३८ वर्षपछि पक्राउ गरेको छ ।
डाँकाचोरी मुद्दामा जिल्ला अदालत स्याङ्जाबाट आठ महिना चार दिन कैद तोकिएका पुतलीबजार नगरपालिका–८ (साविकको कोल्मा बराहचौर गाविस–८) का ६८ वर्षीय कृष्णबहादुर शाहीलाई शुक्रबार प्रहरीले पक्राउ गरेको हो ।
शाहीले पुतलीबजार नगरपालिका–८ (साविकको बहाकोट–७) गेउडाँडामा भएको डाँकाचोरी घटनामा स्याङ्जा जिल्ला अदालतले २०४३ साल माघ ७ गते कैदको फैसला गरेको जिल्ला प्रहरी कार्यालय स्याङ्जाका सूचना अधिकारी प्रहरी नायव उपरीक्षक प्रसन्न राज चौधरीले जानकारी दिनुभयो ।
पक्राउ परेका शाहीलाई कैद भुक्तानको लागि अदालतमा उपस्थित गराइ जिल्ला कारागार स्याङ्जा चलान गरिएको उहाँको भनाइ छ । शाही लामो समयदेखि लुकिछिपी बस्दै आएको प्रहरीले जनाएको छ ।
