काठमाडौँ, मङ्सिर १३ गते । सञ्चार तथा सूचना प्रविधिमन्त्री जगदीश खरेलले सरकारको मुख्य प्राथमिकता सुशासन, भ्रष्टाचार नियन्त्रण र निर्वाचन रहेको बताउनुभएको छ ।
संखुवासभा–काठमाडौँ पत्रकार समाजले शुक्रबार आयोजना गरेको मनराम–एसकाज पत्रकारिता पुरस्कार–२०८२ वितरण समारोहमा मन्त्री खरेलले जनताले अनुभूति गर्ने गरी सुशासन प्रवर्धनलाई प्राथमिकता दिइने बताउनुभयो ।
सञ्चारमन्त्री खरेलले घोषित मितिमै निर्वाचन सम्पन्न गर्न सरकारले सबैखाले तयारी गरेर निर्वाचनको माहोल बनाएको तथा राजनीतिक दलहरुले पनि निर्वाचनको माहोल बनाइरहेको उल्लेख गर्नुभयो ।
सञ्चारमन्त्री खरेलले भन्नुभयो, “सरकारको प्राथमिकता आगामी फागुन २१ गते निर्वाचन सम्पन्न गर्नुपर्नेछ । सुशासन र भ्रष्टाचार नियन्त्रणको कामलाई अगाडि बढाउनुपर्नेछ, जनताको नजरमा नागरिक सरकारले नागरिकले सुन्ने र देख्खनेगरी सुशासनको क्षेत्रमा काम गर्नुपर्नेछ ।”
सञ्चारमन्त्री खरेलले पत्रकारिता क्षेत्रको योगदान तथा संखुवासभा पत्रकार समाजको सक्रिय पहलको प्रसंशा समेत गर्नुभयो । उहाँले जिम्मेवारीपूर्ण, तथ्यपरक र समाजमुखी पत्रकारिताले देशको समग्र विकासमा महत्त्वपूर्ण भूमिका खेल्ने उल्लेख गर्नुभयो ।
मनराम–एसकाज पत्रकारिता पुरस्कार पुरस्कार पत्रकार पोखरेललाई
यस वर्षको मनराम–एसकाज पत्रकारिता पुरस्कार वरिष्ठ पत्रकार गोविन्द पोखरेललाई प्रदान गरिएको छ । आयोजककोतर्फबाट सञ्चारमन्त्री खरेलले उक्त पुरस्कार वितरण गर्नुभएको हो । लामो समयदेखि निरन्तर रूपमा पत्रकारिता र लेखन क्षेत्रमार्फत समाज तथा संखुवासभाको पहिचान, विकास र सुदृढीकरणमा पुर्याएको योगदानका आधारमा उहाँलाई सम्मान गरिएको हो ।
कार्यक्रममा मनराम फाउन्डेशन नेपालका अध्यक्ष सुजन कुमार श्रेष्ठ र एसकाजका अध्यक्ष शंकर खनालले पत्रकार पोखरेलको समर्पित योगदानले नयाँ पुस्तालाई प्रेरणा दिएको बताउनुभयो ।
मन्त्री खरेलले सुशासनका लागि खर्च कटौती गर्ने नीतिसहित काम गरिरहेको बताउनुभयो । प्रधानमन्त्री सुशीला कार्कीले कम खर्च र मितव्ययिता अपनाउँदै काम गर्ने र ‘जेनजी’ को माग पूरा गर्न स्पष्ट निर्देशन दिएको उहाँले बताउनुभयो ।
