कन्हैयालाल केशरी
कोलकाता (भारत), मङ्सिर १३ गते । समुद्रीमार्ग हुँदै तेस्रो मुलुकबाट आयात हुने समान वीरगन्जसम्म रेलवे वा ट्रक कन्टेनरमा ढुवानी गर्दा स्थलमार्गमा विशेष गरी झारखण्ड र विहार राज्यका प्रहरीले दुःख दिने गरेको गुनासो नेपाली आयातकर्ताले गरेका छन् । अत्यधिक भार र कन्टेनरको उचाइ बढी भएको भन्दै अनावश्यक दुःख दिँदै जरिबाना तिराउने गरेको नेपाली आयातकर्ताको गुनासो छ ।
नेपाल कार्गो ह्यान्डलिङ एजेन्ट एसोसिएसन कोलकाताका सचिव महेन्द्रकुमार दुगडले कोलकाता हुँदै वीरगन्ज भन्सार कार्यालयसम्म मालबाहक ट्रकबाट ढुवानी गर्दा विभिन्न बहानामा झारखण्ड र विहार राज्यका प्रहरीबाट झन्झट तथा अनावश्यक दुःख बेहोर्नु परेको बताउनुभयो ।
नेपाली महावाणिज्य दूतावास कोलकाताका महावाणिज्यदूत झक्कप्रसाद आचार्यले नेपालका व्यापारी तथा व्यवसायीले ट्रक र कन्टेनरमार्फत मालसामान ढुवानी गर्दा भारतको झारखण्ड र विहार राज्यका प्रहरीबाट दुःख दिने गरेको गुनासो बेलाबखत आउने गरेको भए पनि नेपाली महावाणिज्य दूतावासको अधिकार क्षेत्र सीमित रहेका कारण केही गर्न नसकिएको बताउनुभयो । उहाँले नेपाली महावाणिज्य दूतावासको कार्यक्षेत्र कोलकाताभित्र मात्र सीमित रहेको जानकारी दिनुभयो ।
हल्दिया र कोलकाता बन्दरगाह तेस्रो मुलुकबाट रेलवे ट्याङ्कर र ट्रक कन्टेनरबाट ढुवानी हुने गरेको छ । कोलकाता बन्दरगाहबाट रेलवेबाट लगभग ६० प्रतिशत र ट्रक कन्टेनरबाट ४० प्रतिशत समान ढुवानी हुन्छ ।
नेपाललाई भारत सरकारले उपलब्ध गराएका दुई बन्दरगाहमध्ये कोलकाताको सहजीकरण कोलकातास्थित नेपाली महावाणिज्य दूतावास र विशाखापत्तनमको समन्वय र सहजीकरण नेपाली राजदूतावास दिल्लीले गर्ने गरेको छ । कोलकाता पोर्टभन्दा विशाखापत्तनमको दुरी झन्डै दोब्बर बढी रहेकाले नेपाली आयातकर्ता कोलकाता पोटलाई बढी रुचाउने गरेका छन् । नेपालका लागि हुने आयातको लगभग ७० प्रतिशत कोलकाता पोर्टबाट हुने गरेको छ ।
