बायोमेट्रिक दिन नपरेपछि कार्यालयमा भीडभाड कम

काठमाडौँ, मङ्सिर १ गते ।  आगामी फागुन २१ गते हुने प्रतिनिधि सभा सदस्य निर्वाचनलाई लक्षित गरी मतदाता नामावली सङ्कलन तथा अद्यावधिकका लागि पाँच दिन म्याद थप भएको छ । सो अनुसार आज पनि मतदाता नामावलीमा नयाँ नाम दर्ता गराउने क्रम देशभर जारी छ । 

काठमाडौँमा २९ हजार 

जिल्ला निर्वाचन कार्यालय, काठमाडौँका प्रमुख ठाकुरप्रसाद भट्टराईका अनुसार आइतबारसम्म मतदाता नामावलीमा नयाँ नाम दर्ता गर्नेको सङ्ख्या २९ हजारभन्दा बढी छ । राष्ट्रिय परिचयपत्रमार्फत अनलाइन फाराम भर्दा जिल्ला निर्वाचन कार्यालयमा बायोमेट्रिक दिन नपरेपछि कार्यालयमा भौतिकरुपमा उपस्थित भई दर्ता गराउनेको सङ्ख्या कम हुँदै गएको उहाँको भनाइ छ ।

राष्ट्रिय परिचयपत्रमार्फत अनलाइनबाट कसरी नाम दर्ता गराउन  सकिन्छ भन्ने जिज्ञासामा भट्टराईले भन्नुभयो, “निर्वाचन आयोगको वेबसाइटमा जाने, त्यहाँ मतदाता नामावली प्रि–रजिष्ट्रेसन र अद्यावधिक भन्ने छ । त्यसपछि नयाँ दर्ता भन्नेमा जाने । त्यहाँ गएपछि दुईटा अप्सन छ, राष्ट्रिय परिचयपत्र भएको र नभएको । राष्ट्रिय परिचयपत्र भएकोले सबै विवरण भर्ने, त्यसपछि दर्ता सफल भएको मेसेज आउँछ ।”

तत्पश्चात् आयोगले कोड नम्बर पठाउने र पछि प्रमाणीकरण हुने उहाँको भनाइ छ । निर्वाचन आयोगको कार्यालयले प्रमाणीकरण गरेपछि मेसेज वा ईमेलमा अर्को कोड उपलब्ध गराउने व्यवस्था मिलाइएको छ ।

उहाँले स्वदेशमा रहेकाका लागि मेसेज र विदेशमा रहेका नागरिकका लागि ईमेलको व्यवस्था मिलाइएको जानकारी दिनुभयो ।

ललितपुरमा  १६ हजार ३१० 

जिल्ला निर्वाचन कार्यालय, ललितपुरका प्रमुख गोमा धमला घिमिरेका अनुसार आइतबार साँझसम्म मतदाता नामावलीमा दर्ता गराउनेको सङ्ख्या १६ हजार ३१० छ ।

राष्ट्रिय परिचयपत्रमार्फत अनलाइन फाराम भरेर बायोमेट्रिकका लागि निर्वाचन कार्यालय आउन नपरेपछि कार्यालयमा भीडभाड कम हुँदै गएको उहाँ बताउनुहुन्छ ।

भक्तपुरमा १३ हजार २८०  

जिल्ला निर्वाचन कार्यालय, भक्तपुरका प्रमुख प्रकाश मगरका अनुसार आइतबार साँझसम्म १३ हजार २८० जनाले मतदाता नामावलीमा नाम दर्ता गराएका छन् । उहाँले भक्तपुरमा दैनिक न्यूनतम छ सयदेखि अधिकतम १२ सय जना मतदाता नामावलीमा नाम दर्ताका लागि भौतिक रुपमा उपस्थित हुने गरेको जानकारी दिनुभयो । 

उहाँले राष्ट्रिय परिचयपत्रमार्फत अनलाइन फाराम भरेपछि निर्वाचन कार्यालयमा बायोमेट्रिक दिन भौतिकरुपमा उपस्थित हुन नपरे पनि नाम दर्ता गराउने व्यक्ति विभिन्न गुनासो लिएर आउने गरेको जानकारी दिनुभयो । 

उहाँले भन्नुभयो, “राष्ट्रिय परिचयपत्र भएका नागरिकले मतदाता नामावलीमा नाम दर्ता गर्नको लागि निर्वाचन आयोगको नयाँ दर्ताको प्रक्रियामा गएर विवरण भरेपछि बायोमेट्रिकको लागि निर्वाचन कार्यालय आउनुपर्दैन । तर, त्यहाँ फाराम भरिसकेपछि पनि उहाँहरु कन्फर्मेसन भए, नभएको दुविधा भएकोले जानकारी लिइराख्नुभएको छ ।”

उपत्यकाका निर्वाचन कार्यालयका प्रमुखहरुका अनुसार काठमाडौँ, ललितपुर र भक्तपुरमा युवाहरुको उत्साहजनक सहभागिता देखिएको बताएका छन् । स्थायी बसोबास उपत्यकाबाहिर रहेका नागरिकले पनि उपत्यकामा उपलब्ध जिल्ला निर्वाचन कार्यालयबाट मतदाता नामावलीमा नाम दर्ता गराएको उनीहरुको भनाइ छ ।