दोहा फोरम २०२५ : ‘कार्यमा न्याय, प्रगतिका लागि प्रतिज्ञा’ विषयमा विश्व नेता एकत्रित हुने

दोहा, कात्तिक २५ गते । कतारको राजधानी दोहामा आगामी डिसेम्बर ६ र ७ मा दोहा फोरमको २३ औँ संस्करण आयोजना हुने भएको छ । ‘कार्यमा न्यायः प्रगतिका लागि प्रतिज्ञा’ भन्ने विषयवस्तुमा केन्द्रित यस फोरमले विश्वभरका राष्ट्र प्रमुख, नीति निर्माता, कूटनीतिज्ञ र विज्ञलाई एक मञ्चमा ल्याई शान्ति, सुरक्षा, आर्थिक लचिलोपन तथा प्राविधिक रूपान्तरण जस्ता समसामयिक वैश्विक चुनौतीबारे छलफल गराउने बताइएको छ ।

कतारका अमिर शेख तमिम बिन हमद अल थानीको संरक्षणमा आयोजना हुने दोहा फोरम २०२५ ले कूटनीति र बहुपक्षीय सहयोगप्रतिको कतारको दृढ प्रतिबद्धतालाई पुनः पुष्टि गर्ने छ । यस वर्षको फोरमले विश्वलाई न्यायपूर्ण, सन्तुलित र दिगो दिशातर्फ अघि बढाउने उपाय खोज्ने लक्ष्य लिएको छ ।

दोहा फोरमका कार्यकारी निर्देशक मुबारक अजलान अल-कुवारीले भन्नुभयो, “विश्व तीव्र रूपले परिवर्तन भइरहेका बेला दोहा फोरम संवाद र कूटनीतिका लागि एक तटस्थ तथा समावेशी मञ्च बनेको छ । विविध दृष्टिकोणलाई एउटै स्थानमा ल्याएर हामी आपसी समझदारी र साझा हितमा आधारित दीर्घकालीन समाधान खोज्ने उद्देश्य राख्छौँ ।”

त्यस्तै, फोरमकी महाप्रबन्धक महा अल–कुवारीले भन्नुभयो, “दोहा फोरम २०२५ ले न्यायलाई विश्व संवादको केन्द्रमा राख्दै छ-यो केवल एक आदर्शको रूपमा नभई साझा जिम्मेवारीको रूपमा हो । यहाँ हुने छलफलले सहयोग र ठोस परिणाममा रूपान्तरण हुनुपर्छ भन्ने हाम्रो लक्ष्य हो ।” अन्तर्राष्ट्रिय थिङ्कट्याङ्क र संस्थासँगको सहकार्यमा तयार पारिएको यस वर्षको कार्यक्रमले द्वन्द्व रोकथाम, आर्थिक सुधार, ऊर्जा सुरक्षा, कृत्रिम बुद्धिमत्ता (एआई) शासन र मिडिया अखण्डता जस्ता मुद्दामा बहुआयामिक छलफल समेट्ने छ ।

फोरमका प्रमुख सत्रमा अमेरिकी मध्यपूर्व रणनीति, सिरियाको सङ्क्रमण, विश्वव्यापी व्यापार पुनर्विचार, आणविक हतियार नियन्त्रण, स्वास्थ्य वित्तपोषणमा साझेदारी, एआईद्वारा आर्थिक रूपान्तरण, अमेरिका-चीन सम्बन्ध र विश्व सहायतामा देखिएका परिवर्तनलगायत महत्वपूर्ण विषय समावेश छन् ।

फोरममा राष्ट्र तथा सरकारका प्रमुखदेखि लिएर विदेशमन्त्री, अन्तर्राष्ट्रिय संस्थानका नेता र विश्व नीति निर्माणमा प्रभाव पार्ने प्रख्यात विज्ञ सम्मिलित हुने अपेक्षा गरिएको छ । यस वर्ष १६० भन्दा बढी देशका करिब पाँच हजार प्रतिनिधिले सहभागिता जनाउने अनुमान गरिएको छ ।

अन्तर्राष्ट्रिय संवादका लागि विश्वका अग्रणी मञ्चमध्ये एकको रूपमा स्थापित दोहा फोरमले सहकार्य, जवाफदेहिता र साझा विश्वव्यापी प्रगतिलाई अघि बढाउने कूटनीतिक केन्द्रका रूपमा निरन्तर भूमिका निर्वाह गरिरहेको बताइएको छ । रासस/एजेन्सी