साहारा लिम्बू
फुङलिङ, कात्तिक २५ गते । ताप्लेजुङको सुकेटार विमानस्थलमा उडान तालिका थप भएको छ । साताको शुक्रबार मात्र उडान गरिरहेको नेपाल वायुसेवा निगमले ताप्लेजुङ–काठमाडौँ–ताप्लेजुङका लागि सोमबार समेत तालिका थप गरेको हो ।
निगमको ग्राउण्डेड भएको जहाज मर्मतपछि सञ्चालनमा आएकाले उडान तालिका थप गरिएको ताप्लेजुङका स्टेसन इन्चार्ज नारायणकुमार कार्कीले जानकारी दिनुभयो । उहाँका अनुसार हाल साताको शुक्रबार र सोमबार दुईदिन उडान तालिका छ । निगमसँग भएको दुई वटा ट्विनअटर जहाज सञ्चालनमा आएपछि यात्रुको चापलाई दृष्छिगत गर्दै उडान थप भएको हो ।
इन्चार्ज कार्कीका अनुसार साताको बुधबारसहित तीन दिन उडानका लागि प्रस्ताव गरिएपछि केन्द्रबाट तालिका आउन बाँकी छ । ताप्लेजुङबाट पठाइएको प्रस्ताव स्वीकृत भए सातामा तीन दिन उडान हुनेछ ।
सोमबारका लागि तय भएको नियमित उडान मङ्गलबार सारिएको थियो । प्राविधिक त्रुटिका कारण सोमबार हुन नसकेको उडान मङ्गलबार (आज) भएको छ । काठमाडौँबाट सात जना यात्रु आएको र ताप्लेजुङबाट पाँच जना यात्रु काठमाडौँ प्रस्थान गरेको इन्चार्ज कार्कीले जानकारी दिनुभयो ।
हाल मौसममा सुधार भएको र निगमसँग भएका दुई वटा जहाज सञ्चालनमा आएकाले सातामा न्यूनतम दुई वटा उडान हुने उहाँको भनाइ छ । यात्रुको चापलाई दृष्टिगत गरेर साताको बुधबारसमेत उडान तालिका थप गर्ने सम्भावना रहेको बताइएको छ । आगामी उडान तालिका भने शुक्रबारका लागि तय भएको छ ।
