चन्द्र पन्दाक
ताप्लेजुङ, कात्तिक १५ गते । ताप्लेजुङमा अपराधजन्य घटना बर्सेनी बढ्दो क्रममा रहेको पाइएको छ । जिल्ला प्रहरी कार्यालयको तथ्याङ्कअनुसार कर्तव्य ज्यान, जबरजस्ती करणी, राष्ट्रसेवकमाथि बाधा अवरोध सिर्जना गर्नेसहित अपराधजन्य घटना बढ्दो क्रममा रहेको पाइएको हो ।
जिल्ला प्रहरी कार्यालयको पछिल्लो तीन वर्षको तथ्याङ्कअनुसार प्रत्येक वर्ष अपराधजन्य घटना बढेको छ । अघिल्लो आर्थिक वर्षको तुलनामा गत आर्थिक वर्ष २०८१/८२ मा अपराजन्य घटना ११ बढि रहेको छ । अघिल्लो आवमा १८१ अपराधका घटना भएकोमा गत आवमा १९२ वटा घटना भएका छन् ।
त्यस्तै आव २०७९/८० मा १६३ वटा अपराधजन्य घटना भएको जिल्ला प्रहरी कार्यालय मुद्दा शाखाको तथ्याङ्क रहेको छ । शाखाको तथ्याङ्क अनुसार जिल्लामा बर्सेनी अपराजन्य घटना बढेको पाइएको छ । अघिल्लो आवमा कर्तज्य ज्यान तथा ज्यान मार्ने उद्योगका ११ वटा घटना हुँदा गत आवमा १७ वटा घटना भएका छन् । आव २०७९÷८० मा भने सोही प्रकृतिका नौ वटा घटना भएका छन् ।
यस्तै, गत आवमा जबरजस्ती करणी र करणी उद्योगका २६ वटा घटना हुँदा अघिल्ला दुई आवमा समान १६–१६ वटा घटना भएका प्रहरीको तथ्याङ्क रहेको छ । गत आवमा राष्ट्रसेवकमाथि बाधा अवरोध सिर्जना गर्ने ३२ वटा घटना भएका छन् । अघिल्लो आवमा २५ र आव २०७९/८० मा २२ वटा सोही प्रकृतिका घटना भएका छन् ।
यसरी जिल्लामा अढाई दर्जन प्रकृति अर्थात शीर्षकका विभिन्न अपराधजन्य घटना हुने गरेको जिल्ला प्रहरी कार्यालयको अभिलेख रहेको छ । चालु आवको तीन महिनाको अवधिमा पनि विभिन्न ५१ वटा अपराधजन्य घटना भएका छन् । साउन महिनामा २४ वटा, भदौमा १६ र असोज महिनामा ११ वटा अपराधजन्य घटना भएका छन् ।
