मनास्लु क्षेत्रमा विदेशी पर्यटक पहिरोमा पुरिइन्

गुणबहादुर रोका
सुलीकोट, कात्तिक १५ गते । उत्तरी गोरखाको मनास्लु क्षेत्र घुम्न गएकी विदेशी महिला पर्यटकलाई पहिरोले पुरेको छ । चुमनुब्री गाउँपालिका – ३ न्याकफेदीनिर झरेको पहिरोले चेक रिपब्लिककी ५४ वर्षीया क्याटरिना रस्कोभालाई पहिरोले पुरेको गाईड रमेश भट्टले जानकारी दिनुभयो ।

उहाँका अनुसार न्यायकफेदीभन्दा माथि भीरमा शुक्रबार बेलुका पहिरोले पुरेको हो । ‘‘भीरबाट झरेको पहिरोले उहाँलाई पुरेको छ,’’ गाईड भट्टे भन्नुभयो, ‘‘उहाँको टाउको मात्र देखिएको छ, उहाँका श्रीमान र म चाहि केहि मिटर दूरी टाढा भएकाले सकुशल छौँ ।’’

‘‘उक्त पदमार्गमा अत्यधिक मात्रामा पर्यटकको हिँडिरहनु भएको थियो,’’ भट्टले भन्नुभयो, ‘‘धेरै पर्यटक र गाईड हुँदा समेत पहिरोको जोखिम भएकाले कसैले पनि उद्धार गर्न सक्ने अवस्था छौँ ।’’

घटनाबारे थाहा पाउने वित्तिकै जिल्ला प्रहरी कार्यालय गोरखाले घटनास्थलतर्फ फिलिम चौकीबाट प्रहरी पठाइसकेको जनाएको छ ।

विदेशी महिला पर्यटक पुरिएको ठाउँभन्दा झण्डै आधा घण्टा अगाडि ठाउँ ठाउँमा ढुङ्गासहित ठुलो पहिरो खसिरहेका कारण दुर्घटनास्थलमा अझै प्रहरी पुग्न नसकेको जिल्ला प्रहरी कार्यालय गोरखाका प्रहरी नायब उपरीक्षक राजकुमार श्रेष्ठको भनाइ छ ।

पहिरो गएको न्यायक फेदी मानवीय बस्तीबाट धेरै टाढा भएकाले तत्काल उद्धार गर्न नसकिएको प्रहरी नायब उपरीक्षक श्रेष्ठले बताउनुभयो ।

मौसम खराब भएका कारण जिल्ला प्रशासन कार्यालय गोरखाले सोमबारदेखि १६ गते आइतसम्म उत्तरी गोरखामा आउने आन्तिरिक तथा बाह्रय पर्यटकलाई यात्रा नगर्न सार्वजानिक सूचना समेत जारी गरी अपिल गरेको थियो ।

गोरखापत्र अनलाइन