सिन्धुली समाचारदाता
सिन्धुलीमाढी, कात्तिक १२ गते । सिन्धुली जिल्लामा सञ्चालित भाडाका सार्वजनिक यातायातका साधनमा विद्यार्थी, अपाङ्गता भएका र ज्येष्ठ नागरिकले आरक्षणको सुविधा पाउन सकिरहेका छैनन् ।
सार्वजनिक यातायातका साधनमा भाडामा छुटको सुविधासहित आरक्षणको व्यवस्था राज्यले गरेको धेरै वर्ष भए पनि सिन्धुली जिल्लामा त्यो कार्यान्वयन नभएको विद्यार्थी, अपाङ्गता भएका व्यक्ति र ज्येष्ठ नागरिकको गुनासो रहेको छ ।
सरकारले यातायात व्यवसायीसँगको सहमतिमा परिचयपत्र हुने विद्यार्थीलाई सार्वजनिक यातायातमा ४५ प्रतिशत भाडा छुटको व्यवस्था गरेको छ । ६० वर्ष उमेर नाघेका ज्येष्ठ नागरिक र अपाङ्गता भएका व्यक्तिलाई पनि आरक्षणको सुविधासहित भाडामा ५० प्रतिशत छुटको व्यवस्था गरेको छ । भाडादरमा छुटको व्यवस्था भए पनि सिन्धुली जिल्लाबाट
काठमाडौँ, जनकपुर, बर्दीबास, वीरगन्ज, नारायणगढ, काँकडभिट्टालगायतमा चल्ले कुनै पनि यातायातका साधनले छुट नदिएको पीडितको गुनासो छ ।
ज्येष्ठ नागरिक सङ्घका जिल्ला अध्यक्ष देवीप्रसाद देवकोटा उक्त सुविधा नियम कानुनले दिए पनि व्यवहारमा लागु नभएको गुनासो गर्नुहुन्छ । उहाँले भन्नुभयो, “हामी त्यो मुद्दामा लडिरहेका छौँ । नियममा लागु भएको कुरा गाउँबाटै उपभोग गरेर आउनु पर्छ भन्छन् मन्त्रालयका सचिव तर स्थानीय तहले त्यसलाई वास्ता गरिरहेको छैन ।”
राज्यले दिएको उक्त सुविधासहितको कार्ड ज्येष्ठ नागरिकसँग भए पनि सुविधा भने उपभोग गर्न नपाएको उहाँको भनाइ छ । उहाँका अनुसार सिन्धुली जिल्लामा मात्रै ज्येष्ठ नागरिकको सङ्ख्या २५ हजारभन्दा बढी रहेको उहाँले जानकारी दिनुभयो । “धेरै पटक नगरप्रमुख, प्रमुख जिल्ला अधिकारी, एसपीलगायतका सरोकारवाला पक्षबिच बसेर छलफल पनि ग¥यौँ,” जिल्ला अध्यक्ष देवकोटाले भन्नुभयो, “तर कार्यान्वयनमा आउन सकेको छैन ।” राजधानी काठमाडौँ जाँदा सार्वजनिक यातायातका साधनमा ज्येष्ठ नागरिक, अपाङ्गता भएका र महिलालाई सिटको आरक्षण देखेको भए पनि सिन्धुलीबाट चल्ने त्यस्ता गाडीमा त्यो सुविधासमेत नभएको उहाँले बताउनुभयो ।
“सार्वजनिक यातायातका साधनमा ज्येष्ठ नागरिक र अपाङ्गता भएका व्यक्तिले आरक्षण भएको सिट पाउन त परै जावस्, झुन्डिएर यात्रा गर्नुपर्ने अवस्था छ,” अध्यक्ष देवकोटाले भन्नुभयो, “राज्यले नियम कानुन त बनायो, स्थानीय तहले कार्यान्वयन गर्न चाँजो नै मिलाउँदैन ।” विद्यार्थी, अपाङ्गता भएका र ज्येष्ठ नागरिकले पाएको उक्त सुविधा सिन्धुली जिल्लामा भने कागजमै सीमित हुन पुगेको विद्यार्थीको गुनासो छ ।
नेपाल विद्यार्थी सङ्घका जिल्ला अध्यक्ष भरत विक जिल्लामा सार्वजनिक यातायातले भाडामा छुट सुविधा केही समयअघिसम्म दिए पनि अहिले बन्द भएको बताउनुभयो । उक्त सुविधा कार्यान्वयनका लागि यातायात व्यवसायीसँग सम्झौताको तयारी भइरहेको बेला जेनजी समूहको आन्दोलन भएर अस्तव्यस्त भएको र अहिले त्यत्तिकै अवस्थामा रहेको उहाँको भनाइ छ ।
सिन्धुली अपाङ्ग सङ्घको जिल्ला अध्यक्ष बबिता थापा आफ्नो परिचयपत्र बोकेको खण्डमा बसले अपाङ्गता भएका व्यक्तिलाई आरक्षण र भाडामा सहुलियत दिएको भए पनि बोलेरो, इभी जस्ता साना गाडीले उक्त सुविधा नदिएको बताउनुहुन्छ । उहाँले भन्नुभयो, “त्यसका लागि सरोकारवाला सबैलाई बोलाई छलफलसमेत गरेका थियौँ तर खासै सुनुवाइ भइरहेको छैन ।”
प्रमुख जिल्ला अधिकारी दिनेशसागर भुसालले दसैँअघि यातायात व्यवसायीसँग भएको छलफलमा उनीहरूले विद्यार्थी, अपाङ्गता भएका व्यक्ति र ज्येष्ठ नागरिकलाई उक्त सुविधा दिन तत्परता देखाएको र नदिए कारबाही भोग्नसमेत तयार रहेको जनाएको बताउनुहुन्छ । उहाँले भन्नुभयो, “राज्यले दिएको सुविधा सबैले पाउनु पर्दछ ।
त्यतिबेलै ट्राफिक प्रहरीलाई सुविधा कार्यान्वयन गराउन निर्देशन दिइएको हो ।” सुनौलो बिपी यातायात प्रालिका अध्यक्ष कान्छामान बलले कतिपय ठुला गाडीले विद्यार्थी भने सित्तै बोक्दै पनि आएको बताउनुभयो । जिल्लाबाट सञ्चालन हुने भाडाका बोलेरो, सुमो जस्ता साना गाडीमा भने आरक्षणको सुविधा दिन नसकिने व्यवसायीले बताएका छन् ।
