काबुल, भदौ ३० गते । पाकिस्तानबाट हालै आफ्नै देश फर्कन बाध्य पारिएका अफगान शरणार्थीले गम्भीर कठिनाइ भोगिरहेको बताएका छन् । उहाँहरूले आवास, खाद्यान्न तथा आधारभूत सेवाको अभावमा जीवन अत्यन्त कठिन बनेको गुनासो गरेका छन् ।
शरणार्थी बिबी शम्सले टोलो न्युजसँग आफ्ना भावना बाँड्दै भन्नुभयो,“हामीलाई घर बनाउने जमिन आवश्यक छ । मेरा बच्चा भोकले पीडित छन् । जाडो नजिकिँदै छ, हामीलाई सहयोग चाहिएको छ । हामी आफन्त र समाजको साथ खोजिरहेका छौँ ।” अर्की महिला शरणार्थी दुयाले पनि सहायता अपुग भएको भन्दै चिन्ता व्यक्त गर्नुभयो ।
“कहिलेकाहीँ थोरै राहत सामग्री आउँछ, तर त्यो सबैका लागि पर्याप्त हुँदैन । यिनीहरूको आवश्यकताप्रति ध्यान दिनु आजको आवश्यकता हो,”उहाँले भन्नुभयो । संयुक्त राष्ट्रसङ्घीय शरणार्थी संस्था (यूएनएचसिआर) का अफगानिस्तान प्रमुख अराफत जमालका अनुसार, सेप्टेम्बरको पहिलो सातामै करिब एक लाख अफगान शरणार्थी पाकिस्तानबाट अफगानिस्तान फर्किएका छन् ।
“यस्तो सङ्कटकालीन अवस्थामा हामी सबैको साझा सहयोग आवश्यक छ । अहिले हामी हाम्रो क्षमताको सीमामा पुगेका छौँ,” जमालले भन्नुभयो । अफगान शरणार्थी आयोगका अनुसार, यसै साता मात्र पाकिस्तान र इरानबाट १० हजार २८८ जना अफगानी नागरिक फिर्ता पठाइएको छ । इस्लामिक अमिरात अफगानिस्तानका उपप्रवक्ता हम्दुल्लाह फिटरातले सामाजिक सञ्जालमा लेख्दै, फर्काइएका नागरिकलाई सक्दो सहयोग गरिन लागेको बताउनुभएको छ ।
यद्यपि, महिला कर्मचारीहरूमाथि तालिबान सरकारले लगाएको प्रतिबन्धका कारण संयुक्त राष्ट्रसङ्घले केही सहायता केन्द्रहरू बन्द गर्नुपरेको समाचारमा जनाइएको छ । यूएनएचसिआरका प्रमुख जमालले भन्नुभयो,“हामीलाई यो निर्णय गर्नुपर्दा निकै दुःख लागेको छ । महिला सहभागिता बिना हाम्रो कार्य सम्पूर्ण बन्न सक्दैन ।” उहाँका अनुसार, ती केन्द्र शरणार्थीलाई प्रारम्भिक नगद सहायता वितरण, नामदर्ता, सुरक्षा सम्बन्धी जाँच र आवश्यक अन्तर्वार्ता लिने अत्यन्त महत्त्वपूर्ण स्थान हुन् । रासस/एएनआई
