नारद कोहार
तौलिहवा(कपिलबस्तु), भदौ १५ गते । समाजलाई शिक्षित, सशक्त र जागरुक बनाउन पुस्ताकलय एक महत्त्वपूर्ण सम्पत्ति रहेको लुम्बिनी प्रदेशका सामाजिक विकास मन्त्रालयका मन्त्री जन्मजय तिमिल्सिनाले बताउनुभएको छ । कपिलबस्तुको तौलिहवामा सामाजिक विकास मन्त्रालयले १८ औं पुस्तकालय दिवसको अवसरमा आयोजना गरेको कार्यक्रममा उहाँले सो कुरा बताउनुभएको हो ।
आजको युग सूचना प्राविधिको युग भए तापनि पुस्तकालयको महत्त्व अझ बढ्दै गएको मन्त्री तिमिल्सिनाले बताउनुभयो । उहाँले भन्नुभयो, “विद्यालयदेखि गाँउसम्म डिजिटल र सामुदायिक पुस्तकालयको पहुँच पुर्याउन आवश्यक देखिन्छ ।” प्रदेशभित्र रहेका सामुदायिक पुस्तकालयहरूको विकास गर्न प्रदेश सरकार प्रथमिकतामा रहेको उहाँको भनाइ छ ।
शिक्षा क्षेत्रको अस्तित्वलाई हेर्दै पुस्तकालयलाई व्यवस्थित गर्न प्रदेश सरकारले सकेत बजेट विनियोजन गर्दै आइरहेको मन्त्री तिमिल्सिनाले बताउनुभयो ।
कार्यक्रममा प्रदेशसभा सदस्य सुधाकर पाण्डेयले १९९३ सालमा स्थापना भएको पुस्तकालय अहिले दुई कट्ठा जग्गा जमिनसहित निरन्तर सेवा दिइरहेको उल्लेख गर्दै यसको दिगोपनका लागि सरकार र समुदाय दुवैको भूमिका अपरिहार्य भएको बताउनुभयो ।
त्यस्तै कपिलवस्तु नगरपालिकाका नगर प्रमुख सुदीप पौडेलले पुस्तकालयलाई “शिक्षा र चेतना विस्तारको आधारस्तम्भ” भन्दै नगरपालिकाले आवश्यक सहयोग गर्ने प्रतिबद्धता व्यक्त गर्नुभयो ।
दिवसको अवसरमा कपिलबस्तुको सदरमुकाम तौलिहवास्थित पशुपति प्रताप पुस्तकालय भवनको उद्घाटन गरिएको हो । वि.स. १९९३ सलामा स्थापना भई सञ्चालनमा आएको पुस्तकालयमा नेपाली, अङ्ग्रेजी, हिन्दी, नेवारी, उर्दु र संस्कृत गरी ७ हजार भन्दा बढी पुस्तकहरू रहेका छन् ।
