काठमाडौँ, भदौ १५ गते । राष्ट्रिय खेलकुद परिषद् (राखेप) ले आफ्नो ६२औँ वार्षिकोत्सवको अवसरमा प्रदान गरेको सम्मान तथा पुरस्कार प्रति नेपाल तेक्वान्दो सङ्घले आपत्ति प्रकट गरेको छ ।
राखेपले भदौ १३ गते आयोजना गरेको सम्मान तथा पुरस्कार कार्यक्रममा विभिन्न विधाका खेलाडी, प्रशिक्षक, कर्मचारी, खेल सङ्घ, प्रायोजक तथा पत्रकारलाई पुरस्कार तथा सम्मान प्रदान गरेको थियो ।
तेक्वान्दो सङ्घले आइतबार एक प्रेश विज्ञप्ती जारी गर्दै राखेपले प्रदान गरेको पुरस्कारले खेलाडी र खेल सङघमाथि विभेदपूर्ण व्यवहार र मनपरीतन्त्र गरेको भन्दै घोर भर्त्सना समेत गरेको छ ।
सङ्घका अध्यक्ष प्रकाश शम्सेर राणाद्वारा जारी विज्ञप्तीमा भनिएको छ, ‘‘राखेपले वर्षभर भए गरेका र प्राप्त उपलब्धिको समिक्षा र मुल्याङ्कन गर्ने संस्कार रहिआएकोमा त्यसो भएको छैन । राखेपको निर्णय प्रायोजित नभएर यथार्थपरक, उपलब्धि र प्रविधिमा आधारित हुने अपेक्षा राखेका छौँ ।’’
राखेपको सम्मान कार्यक्रममा नेपालका लागि पेरिस पारालिम्पिकमा तेक्वान्दोमा ऐतिहासिक कांस्य पदक दिलाउने खेलाडी, प्रशिक्षक र खेल सङ्घप्रति गरेको उपेक्षालाई लिएर तेक्वान्दो सङ्घ नैराश्यता व्यक्त गर्दछ, विज्ञप्तीमा उल्लेख छ ।
तेक्वान्दो सङ्घले राज्यको निकायबाट गरिने मुल्याङ्कनको आधारबारे प्रश्न गर्दै पुरस्कार व्यक्तिगत वा संस्थागत रहेकोमा भन्दै संशय पनि व्यक्त गरेको छ । पुरस्कार निर्णयको अधिकार कसको हातमा रहेको हो ? भन्ने प्रश्न गर्दै छानबिनको मागसहित दोषी उपर कडा कारबाहीको माग समेत गरेको छ ।
