बुटवल, भदाै १५ गते । नेकपा (माओवादी केन्द्र) का अध्यक्ष पुष्पकमल दाहाल ‘प्रचण्ड’ ले सहिद स्मृति प्रतिष्ठान रूपन्देहीका संस्थापक अध्यक्ष स्वर्गीय रामप्रसाद बञ्जाडे ‘टङ्कमणि’ को शालिक अनावरण गर्नुभएको छ ।
आइतबार प्रतिष्ठानको बुटवलस्थित कार्यालय परिसरमा अर्धकदको शालिक अनावरण गरिएको हो । सो अवसरमा टङ्कमणि स् एक ‘क्रान्तिबीज’ पुस्तकको विमोचन पनि गरिएको थियो ।
सो अवसरमा अध्यक्ष प्रचण्डले जनयुद्ध सफल बनाउन तत्कालीन सप्लाई विभागको योगदान महत्त्वपूर्ण रहेको स्मरण गर्नुभयो । उहाँले टङ्कमणिले सप्लाई विभागमा रहेर दस वर्षे जनयुद्धलाई सफल बनाउन विशेष भूमिका खेलेको बताउनुभयो ।
प्रचण्डले जनयुद्धको समयमा जोखिमपूर्ण जिम्मेवारी बहन गरेर काम गर्ने टङ्कमणि साहसी योद्धा भएको उल्लेख गर्नुभयो ।
बुटवल उपमहानगरपालिका प्रमुख खेलराज पाण्डेले टङ्कमणि माओवादी मात्र नभई समग्र समाजका नेता भएको बताउनुभयो । उहाँले उपमहानगर सबै पक्षलाई समेटेर अघि बढिरहेको र परिवर्तनका लागि लडेका योद्धाहरूको सम्मानमा उपमहानगरले कदर गरेको जिकिर गर्नुभयो ।
पाण्डेले आफूहरू कांग्रेस–माओवादी गठबन्धनबाट निर्वाचित भएकाले केन्द्रमा गठबन्धन भत्किए पनि पालिकामा गठबन्धनको मर्मअनुसार काम गरिरहेको स्पष्ट पार्नुभयो ।
कार्यक्रममा पार्टीका उपमहासचिव वर्षमान पुन, सचिव तथा लुम्बिनी प्रदेश इन्चार्ज चक्रपाणि खनाल, पूर्वसभामुख ओनसरी घर्ति, पूर्वमन्त्री रेखा शर्मा, लुम्बिनी प्रदेशका पूर्वमुख्यमन्त्री कुलप्रसाद केसी, जोखबहादुर महरा, प्रदेश अध्यक्ष सुदर्शन बराललगायतका नेता–कार्यकर्ताको उपस्थिति थियो ।
स्व. टङ्कमणिको २०७८ मङ्सिर ८ गते सवारी दुर्घटनामा निधन भएको थियो ।
