काठमाडौँ, भदौ १५ गते। चिकित्सा शिक्षा सुधारका अभियन्ता प्रा.डा. गोविन्द केसीले धनगढीको सहिद दशरथ चन्द स्वास्थ्य विज्ञान प्रतिष्ठानबाट २३ औँ अनशन सुरु गर्नुभएको छ।
सरकारले चिकित्सा शिक्षातर्फ (एमबीबीएस) को सिट सङ्ख्या बढाएको विरोधमा चार बुँदे माग राख्दै डा. केसीले अनशन सुरु गर्नुभएको हो।
चिकित्सा शिक्षा आयोगको २१औं बैठकले एमबीबीएसमा एक हजार ३५९ सिट थपेर दुई हजार ६३५ र बीडीएसको सिट ६२५ पुर्याएको थियो। आयोगले सय सिट सङ्ख्या तोकेको सबै निजी मेडिकललाई सिट बढाएर १३० पुर्याएको छ।
सरकारले बढाएको सिट सङ्ख्या बढाउने निर्णय फिर्ता लिन माग गर्दै आउनुभएका डा. केसीले सरकारले कुनै चासो नदिएपछि आइतबारबाट तीन दिनको लागि अनशन सुरु गर्नुभएको हो।
डा. केसीले २०६९ देखि चिकित्सा शिक्षा सुधारका माग राख्दै अनशन बस्न सुरु गर्नुभएको हो।
