सुधा देव
भारदह(सप्तरी), साउन २६ गते । राजविराज, सखडा, गोविन्दपुर सडक अविलम्ब निर्माणको माग गर्दै पूर्व सिँचाइ मन्त्री उमेश यादवको अगुवाइमा सोमबार पैदल यात्रा गरिएको छ ।
लामो समयदेखि जीर्ण रहेको सडक निर्माणका लागि दबाब दिने उद्देश्यले सखडाबाट गोविन्दपुरसम्मको पैदल यात्रा सम्पन्न गरेको पूर्व मन्त्री यादवले बताउनुभयो । राजविराज सखडा सडक निर्माण गर, कहाँ छ सरकार ? कहाँ छ ठेकेदार ? सुशासन कायम गर, कुशासन अन्त्य गर नारा लगाउँदै मन्त्रीसहित स्थानीयले पैदल यात्रा गरेका हुन् ।
जिल्लाकै मुख्य पर्यटनस्थल छिन्नमस्ता मन्दिर जाने यो मुख्य सडक लामो समयदेखि जीर्ण रहेकाले दैनिक आवतजावत गर्न भक्तजन तथा सर्वसाधारणले सास्ती व्यहोर्नुपरेको छ ।
सडक निर्माणका लागि पटक पटक पहल गरे पनि सडक निर्माणमा कसैले चाँसो नदेखाएपछि दबाब सृजना गर्न पैैदल यात्रा गरेको यादवले बताउनुभयो ।
