जानु पाण्डे
कपिलवस्तु, साउन २५ गते । शनिबार, विजयनगर गाउँपालिका–१, जबाबैराठका थारू समुदायका हातमा पहिलो पटक लालपुर्जा राखिँदै थियो । बिहानैदेखि गाउँमा उत्साहको माहौल थियो । लालपुर्जा हस्तान्तरणका लागि भूमि व्यवस्था, सहकारी तथा गरिबी निवारण मन्त्री बलराम अधिकारी स्वयं गाउँ आइपुग्नुभएको थियो । वर्षौँदेखि आफ्नो भनिने जमिनमा बसोवास गर्दै आएका तर कानुनी कागज नपाएका भूमिहीन २१ घरधुरीलाई पहिलो पटक जग्गाधनी प्रमाणपत्र वितरण गर्नुभएको थियो ।
कपिलवस्तुमा नापी भएको एक महिनाभित्रै भूमिहीन सुकुम्वासीले लालपुर्जा प्राप्त गरेका छन् । विजयनगरका २१ र बाणगङ्गा नगरपालिकाका-७, मोतीपुरडाडाँका २८ घरधुरीले एक महिना मै लालपुर्जा प्राप्त गरेका हुन् । लालपुर्जा वितरण गर्दै मन्त्री यो वर्ष बजेटमार्फत पाँच लाख घरधुरीलाई लालपुर्जा वितरण गर्ने सरकारको लक्ष्य रहेको बताउनुभयो । उहाँले यो आयोगलाई अन्तिम आयोग बनाउने गरी भूमिहीन सुकुम्वासी र भूमिसम्बन्धी समस्या देखिएका करिब १५ लाख घरधुरीलाई लालपुर्जा वितरण गर्ने तयारी रहेको स्पष्ट पार्नुभयो ।
उहाँले सरकारले जनताको समस्या समाधान गर्नका लागी कानुन बनाउँदा गलत हल्ला फिँजाएको बताउनु भयो । वन मास्ने भए, सार्वजनिक जग्गा मास्ने भए, भू माफियालाई जग्गा दिने भए, मिलेमतो गरेर आए, पैसाको चलखेल भयो जस्ता हल्ला फिँजाएका छन् । कतिपय कानुनमा नमिलेका कुरालाई मिलाउनको लागी कानुनमा संशोधन गर्ने गरी विधयेक ल्याइएको दाबी गर्नुभएको थियो ।
विजयनगर गाउँपालिका अध्यक्ष गोपालबहादुर थापाले भूमिहीन सुकुम्वासीलाई जति सक्यो छिटै लालपुर्जा वितरण गर्ने गरी काम गरेको बताउनुभयो । जबाबैराठमा असार २९ देखि साउन १ गतेसम्म नापीको काम सम्पन्न गरिएको थियो । एक हप्ते दाबी–विरोध र १५ दिन राजस्व दाखिला गर्ने समय तोकिएको थियो । मोतीपुर डाँडामा असार १३ देखि सुरु भएको नापी प्रक्रिया एक सातामै पूरा भएको थियो । आवश्यक प्रक्रिया पूरा गरी २८ भूमिहीनले लालपुर्जा पाएको वडाध्यक्ष विष्णु गिरीले बताउनुभयो ।
लालपुर्जा वितरण कार्यक्रममा प्रतिनिधि सभा सदस्य सिराज अहमद फारुकी, प्रमुख जिल्ला अधिकारी दिलकुमार तामाङले मन्तव्य राख्नुभएको थियो । आइतबार मायादेवी गाउँपालिकाका २ हजार घरधुरीलाई लालपुर्जा वितरण गर्ने तयारी भइरहेको नापी कार्यालय, कपिलवस्तुका प्रमुख जनक भण्डारीले जानकारी दिनुभयो । वितरण भएका लालपुर्जा करिब दुई महिनाभित्र मालपोत कार्यालयमा स्रेस्ता कायम हुने छन् ।
