बेलौरी समाचारदाता
कञ्चनपुर, साउन २५ गते । कञ्चनपुरको बेलडाँडीकी १७ वर्षीय सम्झना भट्ट मृत्यु प्रकरणको अनुसन्धानका लागि प्रहरीले शुक्रबार थप एक जनालाई नियन्त्रणमा लिएको छ ।
जिल्ला प्रहरी कार्यालय कञ्चनपुरका अनुसार सम्झना भट्ट मृत्यु प्रकरणको अनुसन्धानका लागि कैलालीको धनगढी विमानस्थलबाट बेलडाँडीकी पूजा भट्टलाई पनि नियन्त्रणमा लिइएको हो । जिल्ला प्रहरी कार्यालय कञ्चनपुरका प्रवक्ता प्रहरी नायब उपरीक्षक सागर बोहोराका अनुसार सम्झनाका माइती पक्षले दिएको किटानी जाहेरीका आधारमा यसअघि मृतकका श्रीमान् पवन भट्ट, ससुरा हरिदत्त भट्ट, सासू किरण भट्टलाई नियन्त्रणमा लिई कञ्चनपुर जिल्ला अदालतबाट म्याद थप गरेर अनुसन्धान भइरहेको छ । पूजा पवनकी दिदी रहेको प्रहरीले जनाएको छ ।
प्रहरी नायब उपरीक्षक बोहोराका अनुसार मृतकका माइती पक्षले प्रहरीसमक्ष बुझाएको एक अडियोमा सम्झनाको हत्या गर्न पूजाले पवनलाई आदेश दिएको सुनिन्छ । अडियोमा ‘सम्झनालाई मारे पनि पाँच वर्ष त सजाय हुने हो, भाइ मार्दे’ भन्ने शब्द प्रयोग भएको छ । प्रनाउ बोहोराले उक्त अडियोको विषयमा पनि छानबिन भइरहेको बताउनुभयो । शुक्रबार पवनकी दिदी पूजालाई पनि नियन्त्रणमा लिएर आत्महत्या गर्न दुरुत्साहन दिन नहुने शीर्षकमा मुद्दा दर्ता गरी अनुसन्धान अगाडि बढाइएको प्रनाउ बोहोराले जानकारी दिनुभयो ।
शवको अन्त्येष्टि
सम्झना भट्ट मृत्यु प्रकरणको अनुसन्धान गरी दोषीउपर कारबाहीको माग गर्दै मृतकका माइती पक्षले शव उठाउन मानेका थिएनन् । मृतकको शव महाकाली प्रादेशिक अस्पतालमा राखिएको थियो । घटनामा संलग्न रहेको आशङ्कामा मृतकका माइती पक्षले चार जनामाथि किटानी जाहेरी दिएका थिए तर यसअघि प्रहरीले पूजालाई नियन्त्रणमा लिएको थिएन । प्रहरीका अनुसार माइती पक्षले घटनाको मुख्य योजनाकार पूजा रहेको आरोप लगाउँदै आएका छन् । पूजालाई पक्राउ नगरुन्जेल शव नउठाउने अडान लिएको थियो । शुक्रबार पूजा पक्राउ परेपछि सम्झनाको माइती पक्षले शवको दाहसंस्कार गरेको उहाँले बताउनुभयो ।
साउन १८ गते बिहान बेलडाँडी गाउँपालिका–२ स्थित सिंह पालटोलमा घरभित्र झुन्डिएको अवस्थामा सम्झना मृत फेला पर्नुभएको थियो । प्रहरीले कोठाको ढोका तोडेर शव बाहिर निकालेको थियो । विगत लामो समयदेखि सम्झना र पवनबिच प्रेम सम्बन्धका कारण गत फागुन महिनामा विवाह भएको मृतकका बुवा भोजराज भट्टले बताउनुभयो । विवाहपछि सम्झनाका श्रीमान् र परिवारका सदस्यले छोरीमाथि दाइजोको निहुँमा यातना दिने, घरेलु हिंसा गर्ने र मानसिक तनाव दिने गरेको उहाँले बताउनुभयो ।
