दुध किसानलाई उत्पादनमा आधारित अनुदान

नवीनराज कुइँकेल

लमजुङ, साउन २० गते । लमजुङका दुध उत्पादक किसानले उत्पादनमा आधारित अनुदान पाएका छन् । भेटेरिनरी अस्पताल तथा पशु सेवा विज्ञ केन्द्र लमजुङले एक लिटर दुधमा पाँच रुपियाँ अनुदान दिएको हो । 

गण्डकी प्रदेश सरकारको दुध उत्सपादनमा आधारित प्रोत्ससाहन कार्यक्रमबाट तीन वटा सहकारी संस्थामार्फत छ लाख ४४ हजार ८ सय १८ लिटर दुध उत्सपादन गरेबापत पाँच रुपियाँका दरले ३२ लाख २४ हजार ९० रुपियाँ अनुदान वितरण गरिएको हो । 

सो अनुदान रकमबाट जिल्लाका एकसय ६० जना किसान लाभान्वित भएको पशु सेवा विज्ञ केन्द्र लमजुङका प्रमुख डा. सुनिल न्यौपानेले जानकारी दिनुभयो । उहाँले सहकारी दुध सङ्कलन गरेको दैनिक विवरणको आधारमा अनुदान दिएको बताउनुभयो । सिधै भन्दा उत्पादनको आधारमा दिइएको अनुदान प्रभावकारी देखिएको कार्यालय प्रमुख न्यौपानेले बताउनुभयो । 

यसैगरी कृत्रिम गर्भाधानबाट जन्मिएका पाडीबाच्छी हुर्काएवापत ६८ जना कृषकलाई प्रति पाडीबाच्छी रु. १० हजारका दरले प्रोत्साहन रकम उपलब्ध गराइएको छ । गत आर्थिक वर्षमा ८३ वटा पाडीबाच्छी हुर्काएबापत अनुदान रकम दिइएको कार्यालयले जनाएको छ । 

यसैगरी बृहत्तर पशु विकास कार्यक्रम अन्तर्गत दुईवटा समूहमार्फत ३७ वटा नयाँ खोर निर्माण गरिएको, दुईवटा फार्ममा तारबार, एउटा डिपिङ ट्याङ्की निर्माण र एउटा बाहिरी सेड निर्माण गरिएको छ । यसैगरी ११ वटा उन्नत नश्लका बोका वितरण, विभिन्न यन्त्र उपकरण वितरण, घाँस खेती प्रवर्धन कार्यक्रम गरी ४८ जना किसानहरु लाभान्वित भएको कार्यालयले जनाएको छ । सो कार्यक्रमबाट चार मेट्रिकटन मासु उत्पादनमा वृद्धि भएको कार्यालय प्रमुख न्यौपानेले बताउनुभयो ।

गत आर्थिक वर्षमा ६७ वटा व्यावसायिक गाईभैँसी फार्ममा एकसय ९७ वटा गाईभैँसीमा भएको थुनेलो रोगको परिक्षण र उपचार गरिएको भेटेरिनरी अस्पताल तथा पशु सेवा विज्ञ केन्द्र लमजुङले जनाएको छ ।