सियोल, साउन १५ गते । दक्षिण कोरियाको एक अदालतले बिहीबार पूर्वराष्ट्रपति युन सुक योलका लागि नयाँ गिरफ्तारी वारेन्ट जारी गरेको छ । धेरै पटक पूर्वराष्ट्रपति युनले उपस्थित हुन अस्वीकार गरेपछि उहाँलाई सोधपुछका लागि जबरजस्ती ल्याउन जारी वारेन्टले अभियोजकहरूलाई सक्षम बनाएको छ ।
युन र उहाँकी श्रीमती, पूर्व प्रथम महिला किम केओन हीको अनुसन्धान गरिरहेका विशेष सल्लाहकारले एक विज्ञप्तिमा भने, “पूर्वराष्ट्रपति युन सुक येओलका लागि आज गिरफ्तारी वारेन्ट जारी गरिएको छ ।” युनले डिसेम्बर ३ मा नागरिक शासनलाई अन्त्य गर्न खोज्दा दक्षिण कोरियालाई राजनीतिक सङ्कटमा पार्नुभयो र सांसदहरूले उहाँको मार्शल कानुनको घोषणालाई मतदान गर्नबाट रोक्नका लागि संसदमा सेना पठाउनुभयो ।
उहाँ जनवरीमा हिरासतमा लिइनुभएका मुलुकको पहिलो राष्ट्रपति हुनुहुन्थ्यो । उहाँलाई धेरै सातासम्म गिरफ्तारीको विरोध गरेपछि हिरासतमा लिइएको थियो । उहाँले अनुसन्धानकर्ताहरूलाई रोक्नका लागि आफ्नो राष्ट्रपति सुरक्षा बलको प्रयोग गर्नुभएको थियो । उहाँलाई मार्चमा प्रक्रियागत आधारमा रिहा गरिएको थियो । यद्यपि उहाँको विद्रोहको मुद्दा जारी रह्यो, तर उहाँले मुद्दासँग सम्बन्धित प्रमाण नष्ट गर्न सक्ने चिन्ताका कारण जुलाईको सुरुमा फेरि हिरासतमा राखिएको थियो ।
संसदीय चुनावमा छेडछाड गरेको आरोपको अनुसन्धान गरिरहेका अभियोजकहरूले युनलाई सोधपुछका लागि बोलाएका थिए तर उहाँ उपस्थित हुन सक्नु भएन । उहाँका वकिलहरूले युनलाई स्वास्थ्य समस्याहरू रहेको बताएका थिए । बुधबार उनीहरूले नजरबन्द वारेन्टका लागि नयाँ अनुरोध दायर गरे । अब जब वारेन्ट जारी गरिएको छ, अभियोजकहरू युनको हालको हिरासत सुविधामा प्रवेश गर्न र सोधपुछका लागि उपस्थित हुन बाध्य पार्न सक्षम छन् । रासस/एएफपी
