“युरोपेली सङ्घप्रति बोस्नियाली जनताको विश्वास कायमै”

अमेरिका, साउन ३ गते । बोस्निया तथा हर्जेगोभिनामा हालै गरिएको एक सर्वेक्षणअनुसार, यदि अहिले जनमत सङ्ग्रह गरियो भने करिब ६९.९ प्रतिशत नागरिकले युरोपेली सङ्घमा सामेल हुने पक्षमा मतदान गर्ने बताएका छन् । यद्यपि अघिल्लो वर्षको तुलनामा यो समर्थन दर १.३ प्रतिशत अंकले घटेको देखिएको छ । 

सन् २०२५ को जुन महिनामा युरोपेली एकीकरण निर्देशनालयद्वारा गरिएको उक्त सर्वेक्षणमा देशभरिबाट एक हजार २०० जना सहभागी भएका थिए । सबैभन्दा बढी समर्थन बोस्निया तथा हर्जेगोभिना महासङ्घमा ८२.९ प्रतिशत, त्यसपछि ब्च्र्को जिल्लामा ७१.३ प्रतिशत र सबैभन्दा कम रेपुब्लिका सप्स्र्कामा ४६.१ प्रतिशत रहेको छ ।

समर्थकहरूले मुख्य लाभका रूपमा यात्रा स्वतन्त्रता, शान्ति र कानूनी शासन व्यवस्था रहेको उल्लेख गरेका छन् । तर ३६.६ प्रतिशत विरोधीले महँगी र कर वृद्धिको चिन्ता व्यक्त गरेका छन् । केहीले सांस्कृतिक पहिचान गुम्ने डर, जनसङ्ख्या पलायन बढ्ने र सरकारी कामकाज थप झन्झटिलो हुने जस्ता आशङ्का पनि देखाएका छन् । 

सर्वेक्षणमा युरोपेली संघको उद्देश्यप्रति शंका पनि देखिएको छ, जसअनुसार ३८.१ प्रतिशत नागरिकले युरोपेली संघ बोस्निया तथा हर्जेगोभिनाको प्राकृतिक स्रोतमा मात्र चासो राख्छन् भन्ने धारणा व्यक्त गरेका छन् भने ३०.९ प्रतिशतले राजनीतिक हस्तक्षेपका कारण एकीकरण प्रक्रिया अवरुद्ध भइरहेको बताए । भविष्यप्रति जनमत बुझाउँदा ३४ प्रतिशत नागरिकले देश आगामी १० वर्षभित्र युरोपेली संघमा सामेल हुन सक्ने विश्वास गरेका छन् भने ५८.४ प्रतिशतले युरोपेली संघलाई बोस्निया तथा हर्जेगोभिनाको सबैभन्दा ठूलो आर्थिक सहयोगीका रूपमा चिनेका छन् । 

उल्लेखनीय कुरा के छ भने बोस्निया तथा हर्जेगोभिना दुई स्वायत्त क्षेत्रहरूमा बाँडिएको देश हो-बोस्निया तथा हर्जेगोभिना महासंघ (जहाँ बोस्नियाली र क्रोएशियाली समुदायको बहुलता छ) र रेपुब्लिका सप्स्र्का (जहाँ सर्ब समुदायको बाहुल्य छ) । यी दुई क्षेत्र कमजोर केन्द्रीय सरकार अन्तर्गत सञ्चालन भइरहेका छन्, भने ब्च्र्को जिल्ला दुबै क्षेत्रको साझा स्वामित्वमा रहेको एक स्वशासित प्रशासनिक इकाइ हो । रासस/सिन्ह्वा