गोरखापत्र समाचारदाता
काठमाडौँ, असार ३२ गते । राष्ट्रिय योजना आयोगका उपाध्यक्ष प्राडा शिवराज अधिकारीले दिगो विकास लक्ष्य कार्यान्वयनका लागि वित्तीय स्रोत परिचालन र विज्ञान, प्रविधि तथा नवप्रवर्तनलाई अघि बढाउन नेपालले थप ठोस कदम चाल्नुपर्ने बताउनुभएको छ ।
अमेरिकाको न्युयोर्कमा दिगो विकाससम्बन्धी उच्चस्तरीय राजनीतिक संयन्त्रको बैठकलाई सम्बोधन गर्दै उहाँले आगामी पाँच वर्षभित्र २०३० सम्मका लक्ष्य हासिल गर्न विश्व समुदाय अझै पछाडि परिरहेको बताउनुभयो ।
उहाँले विश्वव्यापी रूपमा दिगो विकास लक्ष्यको वार्षिक वित्तीय अन्तर ४२ खर्ब अमेरिकी डलर पुगेको बताउँदै नेपालले मात्र एसडिजी हासिल गर्न वार्षिक २३.३ अर्ब अमेरिकी डलर अर्थात् कुल गार्हस्थ उत्पादनको ४४.९ प्रतिशत लगानी गर्नुपर्ने भए पनि त्यसमा ११.१ प्रतिशतको वित्तीय अन्तर रहेको उल्लेख गर्नुभयो ।
प्राडा अधिकारीले एफएफडी ४ को सेभिल्ला प्रतिबद्धता र ग्लोबल डिजिटल कमप्याक्टले यस अन्तरलाई तान्ने महìवपूर्ण आधार तयार पार्ने बताउँदै ती प्रतिबद्धताको शीघ्र र पूर्ण कार्यान्वयनका लागि नेपालले जोड दिएको जानकारी दिनुभयो ।
उपाध्यक्ष अधिकारीले विदेशी सहायताको परिमाण बढाउनुपर्ने र त्यसलाई राष्ट्रिय प्राथमिकतासँग मेल गराउनुपर्ने निजी क्षेत्रको लगानीलाई नवप्रवर्तनात्मक वित्तीय संयन्त्रमार्फत आकर्षित गर्नुपर्ने जलवायु वित्तीय पहुँचमा तीव्रता ल्याउनुपर्ने डिजिटल र प्रविधिगत खाडल कम गर्न कृषि, ऊर्जा र सार्वजनिक सेवामा प्राविधिक सहयोग तथा हस्तान्तरणका लागि विश्वव्यापी सहकार्य बढाउनुपर्ने, संस्थागत क्षमता र मानव संसाधन विकासमा लगानी बढाउनुपर्ने जस्ता मुख्य कुरामा ध्यान दिनुपर्नेमा जोड दिनुभयो ।
उहाँले लक्ष्य महत्वाकाङ्क्षी मात्रै नभई त्यसलाई कार्यान्वयनमा उतार्न ठुलो परिमाणमा वित्तीय स्रोत परिचालन र नवप्रवर्तन आवश्यक रहेको बताउनुभयो ।
यसैबिच दिगो विकास लक्ष्य–३ (स्वास्थ्य तथा मर्यादित जीवन) र अन्य लक्ष्यसँगको अन्तरसम्बन्धबारे एक महìवपूर्ण बैठक सम्पन्न भएको छ । बैठकको अध्यक्षता युएन रेसिडेन्सका राजदूत लोकबहादुर थापाले गर्नुभएको थियो ।
बैठकमा नेपालका तर्फबाट राष्ट्रिय योजना आयोगका उपाध्यक्ष प्राडा शिवराज अधिकारीले नेपालको स्वास्थ्य प्रणाली समावेशी र पहुँचयुक्त ढाँचामा आधारित रहेको र यसले गुणस्तर र जबाफदेहितालाई सुनिश्चित गर्दै आएको जानकारी दिनुभयो ।
उहाँले स्वास्थ्य क्षेत्रमा सबैको पहुँच र सर्वव्यापी स्वास्थ्य सेवाप्रतिको नेपालको प्रतिबद्धता दोहोराउँदै दिगो विकास लक्ष्य हासिल गर्न स्वास्थ्य प्रणालीलाई थप सुधार र दिगोपनातर्फ उन्मुख गराएको बताउनुभयो ।
उपाध्यक्ष अधिकारीले नेपालले पछिल्ला वर्षमा उल्लेख्य प्रगति गरेको भन्दै उहाँले जीवन प्रत्याशी बढेको, मातृ मृत्यु घटेको, खोप तथा स्वास्थ्य सेवाको पहुँच विस्तार भएको उल्लेख गर्नुभयो । यससँगै झन्डै ५५ प्रतिशत स्वास्थ्य खर्च जनताले आफ्नै खल्तीबाट गर्नुपर्ने अवस्थालाई उहाँले चुनौतीका रूपमा प्रस्तुत गर्नुभयो ।
उहाँले स्वास्थ्य बिमाको पहुँच निकै न्यून रहेको अवस्थामा गोजीबाट गरिने खर्चका कारण घरपरिवारलाई प्रतिकूल असर पारेको तथ्य प्रस्तुत गर्दै उहाँले १० प्रतिशतको सीमामा हेर्दा करिब १२ प्रतिशत नेपाली परिवारलाई ठुलो आर्थिक भार पर्ने बताउनुभयो ।
यस्तै तीन प्रतिशतभन्दा बढी गरिबी रेखामाथिका व्यक्ति स्वास्थ्य खर्चकै कारण गरिबीको रेखामुनि धकेलिने अवस्थाले गरिबी निवारणमा थप कठिनाइ सिर्जना गरेको भन्दै उहाँले आर्थिक जोखिमबाट कसरी सुरक्षित रहने र स्वास्थ्य सेवा कसरी सुधार गर्ने भन्ने प्रश्न सबैका लागि मुख्य भएको स्पष्ट पार्नुभयो ।
बैठकमा उहाँले स्वास्थ्य क्षेत्रमा सहनशीलता र दिगो प्रगति सुनिश्चित गर्न सार्वजनिक लगानीलाई अझ प्रभावकारी बनाउन, स्रोतसाधनलाई सबैभन्दा बढी आवश्यक पर्ने समुदायसम्म पु¥याउन र समानता कायम गर्न जोड दिनुभयो ।
-original-thumb.jpg)
