.jpg)
गोरखापत्र समाचारदाता
काठमाडौँ, चैत २३ गते । प्रधानमन्त्री केपी शर्मा ओलीले बहुक्षेत्रीय प्राविधिक तथा आर्थिक सहयोगका लागि बङ्गालको खाडीको प्रयास (बिम्स्टेक) ले परिवर्तनशील समयलाई मात्र नभई क्षेत्रीय सहयोगलाई पुनर्जीवित गर्ने अवसरलाई सदुपयोग गर्नुपर्ने बताउनुभएको छ । उहाँले भन्नुभयो, “मलाई विश्वास छ, शिखर सम्मेलनको विषयवस्तुले हामीलाई त्यो मापन प्रदान गर्दछ, जुन जनता, समृद्धि र कल्याणको पक्षमा छ ।”
थाइल्यान्डको बैङ्ककस्थित होटल साङ्ग्रिलामा बिम्स्टेकको छैटौँ शिखर सम्मेलनलाई शुक्रबार सम्बोधन गर्दै प्रधानमन्त्री ओलीले क्षेत्रीय सम्भावनालाई उजागर गर्न र यस क्षेत्रसँग भएका स्रोतसाधनलाई पुँजीकृत गर्दै सदुपयोग गर्नुपर्नेमा जोड दिनुभयो । त्यसका लागि बिम्स्टेक सदस्य मुलुकहरूबिच एकीकृत प्रयास र एकता जरुरी रहेको औँल्याउनुभएको उहाँको सचिवालयले जानकारी दिएको छ । उहाँले यस क्षेत्रका असमान अर्थतन्त्रको विविधतालाई स्वीकार गर्दै विशेष आवश्यकता भएका सदस्य राष्ट्रलाई सक्षम बनाउन प्राथमिकताका साथ सहयोग गर्न शिखर सम्मेलनमार्फत आह्वान गर्नुभयो ।
सदस्य मुलुकहरूले अपनाइरहेका बिम्स्टेक बैङ्कक भिजन २०३० ले यस क्षेत्रको साझा भविष्यको खाकाका रूपमा काम गर्ने औँल्याउँदै कुनै पनि बिम्स्टेक राष्ट्र पछाडि नपरोस् भन्ने कुरा सुनिश्चित गर्नु सामूहिक जिम्मेवारी भएको उहाँले प्रस्ट पार्नुभयो । बिम्स्टेक बडापत्र र यसले अपनाएका सिद्धान्तहरूप्रति नेपालको तर्फबाट उहाँले प्रतिबद्धता व्यक्त गर्नुभयो । साथै उहाँले जनता जनताबिचको सम्पर्क सञ्जालको नेतृत्व गर्न पाउनुलाई नेपालले ठुलो गर्वका रूपमा लिँदै प्राथमिकताका क्षेत्रहरूमा साझेदारीलाई थप गहन बनाउन तत्पर रहेको पनि प्रस्ट पार्नुभयो । उहाँले थप्नुभयो, “हामी ऐतिहासिक चौबाटोमा उभिएका छौँ, बङ्गालको खाडीलाई समृद्ध, सहज र खुला क्षेत्रमा रूपान्तरण गर्ने हाम्रो अटल प्रतिबद्धतालाई पुनः पुष्टि गरौँ ।”
उहाँले बिम्स्टेक शिखर सम्मेलनका मुख्य अन्तरवस्तु र संयुक्त राष्ट्रसङ्घको दिगो विकास लक्ष्यसँग नेपालले लिएको ‘समृद्ध नेपाल, सुखी नेपाली’ को राष्ट्रिय आकाङ्क्षा गहिरोसँग प्रतिध्वनित भएको अवगत गराउनुभयो । समृद्धि, सहज र खुलापन जस्ता बिम्स्टेक सम्मेलनका तीन आधारस्तम्भ, दिगो विकास लक्ष्य तथा नेपालको राष्ट्रिय आकाङ्क्षा आपसमा गहिरो रूपमा प्रतिध्वनित रहेको उहाँको भनाइ छ ।
उहाँले बिम्स्टेकले दुई गतिशील क्षेत्रहरू (दक्षिण एसिया र दक्षिणपूर्व एसिया) बिचको अद्वितीय सहकार्यको उदाहरण दिने भएकाले साझा र एकीकृत प्रयासमा हातोमालो गर्न आग्रह गर्नुभयो ।
जलवायु परिवर्तनले सम्पूर्ण मानव जातिको अस्तित्वमा सङ्कट सिर्जना गरेको उल्लेख गर्दै प्रधानमन्त्री ओलीले नेपालका हिमालय एसियाका लागि सफा पानीका स्रोत भएको औँल्याउनुभयोे । उहाँले थप्नुभयो, “यहाँका पहाडले विश्वव्यापी तापव्रmम घटाउने काममा योगदान पु¥याइरहेका छन् तर हाम्रोतर्फबाट भएको न्यून कार्बन उत्सर्जनका बाबजुद पनि हामीले तिनका तिता असरहरूको सामना गर्नु परिरहेको छ ।” यसको प्रभाव पहाडहरूमा मात्र नभई तराई र तटीय क्षेत्रहरूमा पनि फैलिएको प्रधानमन्त्री ओलीले स्पष्ट पार्नुभयो ।
पहाडहरूको दुर्दशा र पहाड–महासागरबिचको सम्बन्धलाई उजागर गर्न नेपालले आगामी महिना ‘सगरमाथा संवाद’ को पहिलो संस्करणमा जलवायु परिवर्तनको विषयमा अन्तर्राष्ट्रिय स्तरको सम्मेलन आयोजना गर्न लागेको जानकारी बिम्स्टेक सदस्य मुलुकहरूलाई गराउनुभयो ।
उहाँले हालै गएको विनाशकारी भूकम्पका कारण बहुमूल्य जीवन र सम्पत्तिको क्षतिप्रति म्यानमार तथा थाइल्यान्ड सरकार र जनताप्रति हार्दिक समवेदना र सहानुभूति व्यक्त गर्नुभयो । साथै उहाँले हामी घाइतेहरूको शीघ्र स्वास्थ्यलाभको कामना गर्दै शोकको यस घडीमा नेपाली जनता म्यानमार र थाइल्यान्डसँग साथ रहेको बताउनुभयो ।
शिखर सम्मेलनमा ‘बिम्स्टेक म्यारिटाइम ट्रान्सपोर्ट कोअपरेसन’ मा हस्ताक्षर भएको छ । शिखर सम्मेलनमा थाइल्यान्ड, बङ्गलादेश, भुटान, भारत, म्यान्मार र श्रीलङ्काका प्रधानमन्त्रीलगायतका नेतृत्वले सम्बोधन गर्नुभएको थियो । सम्मेलनमा आयोजक राष्ट्र थाइल्यान्डका प्रधानमन्त्री पे थोङ थान सिनावात्राले स्वागत गर्नुभएको थियो । सम्मेलनले क्षेत्रीय सहकार्यको आयामलाई फराकिलो पार्ने मार्गदर्शकका रूपमा बैङ्कक घोषणापत्र जारी गरेको छ ।
उच्चस्तरीय भेटवार्ता
प्रधानमन्त्री केपी शर्मा ओलीसमक्ष बहुक्षेत्रीय प्राविधिक तथा आर्थिक सहयोगका लागि बङ्गालको खाडीको प्रयास (बिम्स्टेक) का महासचिव इन्द्रमणि पाण्डेले शुव्रmबार शिष्टाचार भेट गर्नुभयो ।
बिम्स्टेकको शिखर सम्मेलन सकिएपछि बैङ्ककस्थित होटल साङ्ग्रिलामा प्रधानमन्त्री ओलीसँग महासचिव पाण्डेले भेट गर्नुभएको हो । भेटमा आगामी क्षेत्रीय विकास परियोजनाम कसरी अगाडि बढ्न सकिन्छ भन्ने विषयमा छलफल भएको थियो । बिम्स्टेकको सचिवालय बङ्गलादेशको ढाकामा रहेको छ ।
