• २३ चैत २०८१, शनिबार

पुल निर्माणपछि फेरिएको भौरा टापु

blog

कर्णाली नदीमा निर्माण गरिएको कोठियाघाट पुल । तस्बिर : ज्योति पन्थी

बबई समाचारदाता

बर्दिया, चैत २२ गते । चारैतिरबाट कर्णाली नदीले घेरिएको भौरा टापुसँग जोडिने पुल निर्माण भएपछि अहिले त्यो क्षेत्रको मुहार नै परिवर्तन भएको छ । मधुवन नगरपालिका र राजापुर नगरपालिका जोड्ने कर्णाली नदीमा २०७१ मा नेपालको सबैभन्दा लामो (एक हजार १५ मिटर) लामो पुल निर्माण भएपछि यो क्षेत्रको विकास र समाज रूपान्तरण भएको छ । 

तत्कालीन समयमा भौरा टापु भनेर चिनिने राजापुर र गेरुवा गाउँपालिका जोडिने पुल निर्माण भएपछि थप विकासको लहर छाएको छ । बर्दिया जिल्लाको कोठियाघाटमा पक्की पुल निर्माण भएसँगै राजापुर क्षेत्रका मुख्य सडक र सहायक सडकसमेत कालोपत्रे भइसकेका छन् भने कतिपय सडक कालोपत्रे हुने क्रममा छन् । सङ्घीयतापछिको पुनर्संरचनाले विकासमा राजापुर नगरपालिका र गेरुवा गाउँपालिकाको मुहार परिवर्तन भएको छ । 

एक दशकअघि सडक सञ्जालसमेत नपुगेको भौरा टापुमा अहिले भने ठुला र चौडा कालोपत्रे सडक बनेका छन् । कर्णाली नदीमा फेरी तरेर जोखिमपूर्ण यात्रा गरेको अनुभव बटुलेका यहाँका बासिन्दा अचेल घरआँगनमा पक्की सडकमा यातायातका साधनबाट ओर्लन सक्ने भएका छन् । पुल बनेसँगै यहाँको कृषि उत्पादनले बजार पाएको राजापुर नगरपालिकाका स्थानीय कृषक केशव पौडेलले बताउनुभयो । 

पुलले स्थानीयको दिनचर्या नै बदलिएको छ । त्यस क्षेत्रमा पहिले सबै घर कच्ची नै थिए । अहिले भने ठुला ठुला पक्की घर, होटेल निर्माण भएका छन् । अब यो ठाउँलाई पर्यटकीय क्षेत्रका रूपमा अगाडि बढाउनुपर्ने होटेल अर्घाखाँचीका सञ्चालक मिलन घिमिरेले बताउनुभयो । पुल निर्माण हुनुअघि यातायात सञ्चालन हुनसमेत कठिनाइ थियो । बिहान र बेलुका मात्र कोठियाघाट वारी र पारि सञ्चालन हुने यातायात अहिले राजापुर र गेरुवा गाउँपालिकाका गाउँ गाउँमा पुगेको कृष्णसार यातायात व्यवसायी प्रालिका अध्यक्ष रवि मल्लले बताउनुभयो । एक हजार १५ मिटर लामो पुलमा लाइट र नेपालको झन्डा लगाएर पर्यटक आकर्षणका लागि नगरपालिकाले काम गरिरहेको छ भने बर्दिया राष्ट्रिय निकुञ्ज आउने पर्यटकलाई पुलसम्म पुर्‍याउने योजनासमेत राजापुर नगरपालिकाले बनाएर काम गरिरहेको राजापुर नगरपालिकाका नगरप्रमुख दिपेश थारूले बताउनुभयो । 

पुल निर्माणभन्दा पहिला राजनीति गर्नेले पुलको एजेन्डा उठाउने गर्थे । अहिले भने पुलको एजेन्डाभन्दा पनि अरू विकासका मुद्दाले प्राथमिकता पाउने गरेको छ । एउटा पुल निर्माण भएपछि त्यो क्षेत्रको विकासको गति कति द्रुत रूपमा अगाडि बढ्छ भन्ने उदाहरण अहिले बर्दियाको भौरा टापु भएको कुरा स्थानीयले महसुस गर्न थालेका छन् ।