दुई किमी सडक चार वर्षमा पनि बनेन

पश्चिम नवलपरासी समाचारदाता 

पश्चिम नवलपरासी, चैत २२ गते । सरावल गाउँपालिकाको केन्द्र जोड्ने पहुँचमार्गको निर्माण पूरा हुन नसक्दा यात्रुलाई समस्या भएको छ । परासी–नारायणचोक हुलाकी सडकखण्डको भिमटाँडीदेखि सरावल गाउँपालिकाको केन्द्रसम्म पुग्ने जम्मा दुई किमी १०० मिटर लामो सडकको काम चार वर्ष पूरा हुन लाग्दा पनि पूरा भएको छैन । 

लुम्बिनी प्रदेश सरकारको लगानीमा २०७८ साल वैशाखमा ठेक्का सम्झौता भएको उक्त सडक सोही वर्षको चैत मसान्तभित्र निर्माण सक्नुपर्ने थियो तर सडक निर्माणको जिम्मा पाएको नवीन कन्स्ट्रक्सन नवलपरासीले उक्त सडक निर्माणमा लापर्बाही गरेपछि बजेट रकम फ्रिज भएको सरावल गाउँपालिकाका अध्यक्ष सुखाडीप्रसाद चौधरीले बताउनुभयो । 

६० प्रतिशत काम पूरा गरेको ठेकेदारलाई कुल बजेट तीन करोड सात लाखमध्ये एक करोड ६३ लाख रुपियाँ भुक्तानी भइसकेको छ । जीर्ण सडकमा अहिले धुलोले गर्दा यात्रा गर्न कठिन हुने गरेको छ भने सडकछेउका स्थानीयले समेत सास्ती भोग्न बाध्य छन् । अध्यक्ष चौधरीले गुनासो गर्दै भन्नुभयो, “जनता गाउँपालिकामा डेलिगेसन लिएर आउँछन्, प्रदेश अन्तर्गतका काममा हामीले हात हाल्न मिलेन, प्रदेशलाई भन्दा भन्दा थाकिसक्यौँ ।” ठेकेदारलाई सडक डिभिजन कार्यालय बुटवलले केही समय कालो सूचीमा समेत राखेको थियो । अब चैत मसान्तभित्र काम सुरु नगरे प्रदेश सरकारले पनि कालो सूचीमा राख्ने प्रक्रिया सुरु हुने प्रदेश सरकार अन्तर्गतका सडक पूर्वाधार विकास कार्यालय परासीका प्रमुख हितेन्द्र रायमाझीले जानकारी दिनुभयो ।

रायमाझीले भन्नुभयो, “ठेकेदारलाई पटक पटक काम सुरु गर्न ताकिता गरेका छाैँ । चैत मसान्तबाट काम सुरु गर्ने प्रतिबद्धता जनाएको छ, अब काम सुरु भएन भने ठेक्का तोडेर नयाँ प्रक्रियामा जान्छौँ ।” ठेकेदारको लापर्बाहीले काम पूरा नभएकाले यस वर्ष काम सक्ने गरी पुनः बजेट विनियोजन गरिएको लुम्बिनी प्रदेश भौतिक पूर्वाधार विकास मन्त्रालयका प्राविधिक सन्तोष चौधरीले बताउनुभयो । गाउँपालिकाको कार्यालय जोड्ने सडक भएकाले धेरै सेवाग्राही उक्त सडक हुँदै आउजाउ गर्ने गर्छन् ।