‘काम एमालेको प्रचार अरूको’

गोरखापत्र समाचारदाता

काठमाडौँ, चैत २२ गते । नेपाल कम्युनिस्ट पार्टी (एमाले) का कार्यवाहक अध्यक्ष ईश्वर पोखरेलले एमालेले गरेको राम्रो कामको प्रचार हुन नसकेको बताउनुभएको छ । 

बिहीबार प्रेस चौतारी नेपालका नवनिर्वाचित पदाधिकारीसँगको भेटमा उहाँले सो कुरा बताउनुभएको हो । पोखरेलले नेकपा (एमाले) ले जस्तो राम्रो काम अन्य राजनीतिक दलले गर्न नसकेको तर प्रचार भने उनीहरूको बढी भएको बताउनुभयो । एमालेका उपाध्यक्षसमेत रहनुभएका पोखरेलले एमालेले गरेका जनपक्षीय कामको प्रचारप्रसार प्रेस चौतारीले गर्नुपर्ने भन्दै नवनिर्वाचित टिमलाई योजनाबद्ध ढङ्गले कार्ययोजना बनाएर प्रचारमा लाग्न आग्रह गर्नुभयो । 

पछिल्लो समय मिडिया काउन्सिल विधेयकको व्यापक विरोध भइरहेको उल्लेख गर्दै उहाँले मिडियालाई नियन्त्रण गर्न नभई नियमन गर्न उक्त विधेयक ल्याइएको स्पष्टीकरण दिनुभयो । उहाँले विधेयकको विरोधभन्दा पनि बुझेर प्रेस चौतारीनिकटका पत्रकारले त्यसको यथार्थ बाहिर ल्याउनुपर्ने बताउनुभयो । उहाँले पार्टीका कामको प्रचार र पार्टीको कामको प्रतिरक्षा गर्नका लागि निर्देशन दिनुभयो । पोखरेलले पत्रकारहरू व्यावसायिक हौँ भन्दा पार्टीका काममा बाधा हुने र पार्टीको हुँ भन्दा व्यवसायमा बाधा पर्ने चुनौतीलाई चिरेर अघि बढ्नुपर्ने बताउनुभयो । 

यसै गरी एमालेका महासचिव शङ्कर पोखरेलले प्रेस चौतारीलाई प्रचारको काममा लाग्न निर्देशन दिनुभयो । उहाँले मादल बजाउँदा हार्मोनियम बजाउन बिर्सिएको, हार्मोनियम बजाउँदा मादल बजाउन बिर्सिएको जस्तो भएको भन्दै दुवै एकै पटक बजाउने हो भने सबैभन्दा राम्रो हुने बताउनुभयो । पोखरेलले देशमा सबैभन्दा राम्रो दल नेकपा (एमाले) मात्र हो भन्दै सङ्गठन भएको शक्ति, राम्रो काम गर्ने पार्टीको नाताले एमालेको प्रचार भने फिक्का भएको बताउनुभयो । उहाँले समीक्षात्मक चेतबाट अघि बढ्नुपर्नेमा जोड दिनुभयो । 

महासचिव पोखरेलले एमालेले दुई वर्षदेखि साइबर आक्रमण भोगिरहेको बताउँदै त्यसविरुद्ध प्रेस चौतारीमा आबद्ध दुई हजारदेखि दुई हजार पाँच सय सदस्यले एकजुट भएर कलम चलाउनुपर्ने बेला आएको बताउनुभयो । पार्टीविरुद्ध कुन कुन शक्ति लागेका छन् भन्ने निक्र्योल गरेर अघि बढ्नुपर्ने उहाँको भनाइ छ । उहाँले मूलधारका मिडियाभन्दा पछिल्लो समय सामाजिक सञ्जाललाई मिडिया मान्ने प्रवृत्ति देखा परेको बताउनुभयो । उहाँले प्रेस चौतारी आफैँमा सबैभन्दा ठुलो सञ्चारगृह रहेको दाबी गर्दै त्यसले पार्टीको हितमा काम गर्नुपर्ने बताउनुभयो ।