आर्थिक वृद्धिदर ४.५ प्रतिशत हुने

गोरखापत्र समाचारदाता

काठमाडौँ, चैत २२ गते । चालु आर्थिक वर्षमा नेपालको अर्थतन्त्रमा सुधार आउने विश्व बैङ्कले प्रक्षेपण गरेको छ । बिहीबार नेपाल विकास प्रतिवेदन सार्वजनिक गर्दै विश्व बैङ्कले आन्तरिक व्यापार, जलविद्युत् तथा धान उत्पादनको वृद्धिले अर्थतन्त्रको सुधारमा सहयोग पुग्ने उल्लेख गरेको हो । 

विश्व बैङ्कका अनुसार चालु आवमा नेपालको अर्थतन्त्र ४.५ प्रतिशतले वृद्धि हुने छ । गत आव यस्तो वृद्धिदर ३.९ प्रतिशत थियो । चालु आवमा देखिएको सुधारले आगामी दुई वर्षसम्म पनि निरन्तरता पाउने विश्व बैङ्कले जनाएको छ । जस अनुसार आगामी दुई आवमा नेपालले औसत ५.४ को वृद्धिदर हासिल गर्ने छ । 

प्रतिवेदनले नेपालको अर्थतन्त्रका सम्भावित जोखिमलाई पनि उल्लेख गरेको छ । जस अन्तर्गत भूराजनीतिक र व्यापारसम्बन्धी अनिश्चितता समावेश गरिएको छ । यसले गर्दा नेपालको वित्तीय क्षेत्रमा ऋणको गुणस्तरमा थप गिरावट आउन सक्ने विश्व बैङ्कको अनुमान छ । त्यस्तै सरकारले बारम्बार कर्मचारीको सरुवा गरेका कारण पुँजीगत बजेट कार्यान्वयनमा हुने ढिलाइलाई पनि विश्व बैङ्कले उल्लेख गरेको छ । 

राष्ट्रिय योजना आयोगका उपाध्यक्ष प्राडा शिवराज अधिकारीले प्रतिवेदनले नेपालको उत्थानशील आर्थिक वृद्धिलाई समावेश गरेको बताउनुभयो । “१६ औँ योजनाको लक्ष्य हासिल गर्न आर्थिक वृद्धिलाई थप मजबुत बनाउनुपर्ने भएकाले प्रभावकारी पुँजीगत बजेट कार्यान्वयन एवं चालु परियोजना समयमै सम्पन्न गर्न आवश्यक छ,” उहाँले भन्नुभयो । 

अर्थतन्त्रलाई गति दिन आवश्यक रोजगारी सिर्जना गर्न निजी क्षेत्रले अगुवाइ गरेको आर्थिक वृद्धिलाई बढावा दिनु अत्यावश्यक भइसकेको विश्व बैङ्कका नेपाल, माल्दिभ्स र श्रीलङ्काका लागि राष्ट्रिय विभागीय निर्देशक डेभिड सिसलेनले बताउनुभयो । “यो हासिल गर्न नेपालले आफ्नै उत्थानशीलता वृद्धिको प्रभावशाली इतिहासको जगमा प्रमुख संरचनागत सुधार कार्यान्वयन गर्न आवश्यक छ,” 

उहाँले भन्नुभयो । नेपाल विकास प्रतिवेदन विश्व बैङ्कले वर्षमा दुई पटक प्रकाशित गर्ने प्रतिवेदन हो, जसमा अघिल्लो वर्षका प्रमुख आर्थिक घटनाक्रमको विस्तृत विश्लेषण गरिने विश्व बैङ्कले जनाएको छ ।