नवीनराज कुइँकेल
लमजुङ, चैत २० गते । खेतबारी जोत्नका लागि बेसीशहर नगरपालिकाले किसानहरुलाई हाते ट्याक्टर (मिनीटिलर) वितरण गरेको छ । नगरपालिकाले ५० प्रतिशत अनुदानमा ३५ वटा हाते ट्याक्टर (मिनीटिलर) वितरण गरेको हो ।
बेंसीसहर नगरपालिकाका प्रमुख गुमानसिंह अर्यालले कृषिलाई यान्त्रिकरण गर्दा उत्पादनमा बृद्धि भएकाले प्रत्येक वर्ष हाते ट्याक्टर वितरण गर्ने गरेको बताउनुभयो । नगरपालिकाले कृषि क्षेत्रलाई यान्त्रिकरण र व्यावसायिक बनाउन जोड दिँदै आएको र कृषि उत्पादन विना नगरपालिकाले समृद्धि हासिल गर्न नसक्ने उहाँले बताउनुभयो ।
नगरपालिकाले सात हर्स पावरको ५३ हजार एक सय ७५ रुपियाँ, ६ हर्स पावरको ४९ हजार तस्न सय ७५ र पाँच हर्स पावरको ३२ हजार आठ सय ७५ रुपियाको ५० प्रतिशत अनुदानमा किसानलाई हाते ट्याक्टर वितरण गरेको हो । नगरपालिकाले सार्वजनिक सूचना जारी गरी आवेदन माग गरेकोमा बढी आवश्यकता र भूगोल मिलाएर किसान छनोट गरी चालु वर्षको बजेटबाट ३५ वटा हाते ट्याक्टर वितरण गरेको हो ।
किसानको मागको आधारमा सात हर्स पावरको १० वटा, ६ हर्स पावरको २१ वटा र ५ हर्स पावरको ४ वटा हाते ट्याक्टर विरण गरिएको प्रमुख प्रशासकीय अधिकृत चेतनाथ अर्यालले जानकारी दिनुभयो ।
कृषि ज्ञान केन्द्र लमजुङका प्रमुख सुदीप खतिवडाले जिल्लामा हाते ट्याक्टरको प्रयोग बढीरहेको बताउनुभयो । उहाँले कृषिका विभिन्न औजारहरुको उपयोगले लागत र समयको बचतको बचत हुने बताउनुभयो ।
